د ایران پارلمان یو اووه کسېزه پلاوی کابل ته راغلی دی او د بهرنیو چارو له سرپرست وزیر مولوي امیر خان متقي سره یې کتلي دي.
د یاد وزارت مرستیال ویاند حافظ ضیاء احمد تکل وايي، د دواړو خواوو ترمنځ کتنه کې پر امنیتي وضعيت، د نشهيي توکو پر ضد پر مبارزې، د قاچاق پر مخنیوي، د پولو پر امنيت خونديتوب او د دواړو هېوادونو ترمنځ پر سوداګرۍ خبرې اترې وشوې.
تکل زیاته کړې: « د بهرنیو چارو سرپرست وزیر په دغه ناسته کې وویل چې د ا.ا.ا په راتګ سره سم، هېواد کې بشپړ امنیت ټينګ شوی دی او افغان امنیتي ځواکونه توانېدلي دي چې د داعش ترهګرو ډله له منځه یوسي. دغه سرتا سري امنیت نه یوازې د افغانتسان بلکې د سیمې او نړۍ په ګټه هم دی.»
متقي زياته کړې، له نشه يي توکو سره د مبارزې په اړه اغېزناک ګامونه پورته شوي او د کوکنارو کښت نږدې صفر ته راښکته شوی او په خبره یې افغانستان اوس مهال د هېوادونو تر منځ د اتصال پر مرکز بدلېدونکی دی.
ایراني پلاوي بیا ویلي، د قاچاق مخنیوي، د سرحدي ستونزو مدیریت او په ناقانونه توګه دواړو خواوو ته د خلکو تګ راتګ مخنیوي په اړه باید دواړه لوري پر ګډه سره کار وکړي.
ضیاء احمد تکل وايي: « د ایران استازو په دغه ناسته کې وویل چې د قاچاق د مخنیوي، سرحدي ستونزو د مدیریت اوغیر مجاز لرونکو خلکو د تګ راتګ مخنیوي په اړه دواړه لوري باید کار وکړي او حل لار ورته پیدا کړي.»
د ایران د مهر دولتي خبرې اژانس ویلي، د ايران بهرنيو چارو وزير حسین امير عبداللهیان له امیر خان متقي سره په ټلیفوني خبرو کې یو ځل بیا په هلمند سیند کې د ایران پر حقابې ټینګار کړی او افغانستان ته یې د ایران د تخنیکي ډلې سفر ته په اشارې ویلي، چې د اوبو په تړاو د ۱۳۵۱ کال د تړون پر بنسټ دا ډول کتنې د لا ډېرې روڼتیا له رامنځته کولو سره مرسته کوي.
د ایران د بهرنیو چارو وزارت خبرپاڼې یوه برخه:« حسین امیر عبداللهیان په ایران کې په پراخه کچه د افغانستان د اوسېدونکو حضور ته په اشارې زیاته کړې، تهران د افغانستان د امنیت، ثبات او د خلکو د هوساینې لپاره په افغانستان کې دننه د ټولو خواوو پر همکارۍ ټینګار کوي.»
په همدې حال کې د سیاسي چارو کارپوهان د متقي او ایراني پلاوي ترمنځ ليدنې او د بهرنيو چارو له وزير سره د ټليفوني خبرو په تړاو بېلابېل لیدلوري لري.
د سیاسي چارو کارپوه سرور نیازی وايي: « زما هېله دا ده چې زموږ ګاونډیان په دغه شته مسایلو کې له افغانانو سره مرسته وکړي او د افغانانو لاسنوی وشي. دلته مثبت ګامونه پورته کړي څو افغانستان کې سوله او امنیت راشي، سوله او امنیت نه یوازې د افغانستان په ګټه ده بلکې زموږ د ګانډیانو په ګټه هم ده.»
د سیاسي چارو کارپوه احمد خان اندړ بیا وايي: « افغانانو د تاریخ په اوږدو کې له ګاونډيانو سره ډېرې ښې اړیکې ساتلي دي.»
په دې ټلیفونې مکالمه کې مولوي امیر خان متقي د هلمند سیند اوبو د وېش په ګډون د یو لړ مسایلو پر سر بحث ترڅنګ عبداللهیان کابل ته بللی دی.
