د قطر بهرنیو چارو وزارت ځانګړي استازي مطلق القحطاني د اسلامي امارت بهرنیو چارو وزارت سرپرست مولوي امیر خان متقي سره کتلي دي.
د بهرنیو چارو وزارت له لورې په خپره شوې خبرپاڼه کې ویل شوي،په دې کتنه کې په بېلابېلو سیاسي، اقتصادي او تجارتي موضوعاتو خبرې شوې او قحطاني د افغانستان اوسنی وضعیت د ډاډ وړ بللی دی.
قحطاني ویلي، سیمه او نړۍ باید له افغانستان سره رغنده تعامل ته راوړاندې شي او شته فرصتونه ضایع نه کړي.
دغه راز په دې کتنه کې دواړو لوریو د افغانستان په تړاو د هر اړخیزو همکاریو دوام او پراختیا اړینه بللې ده.
