د بهرنیو چارو وزارت سیاسي مرستیال شیر محمد عباس ستانکزی د جمعې پر ورځ د « ۱۴۰۲ کال د زمري پر ۶ مه» د کابل دشت برچي سیمه کې د عاشورا مراسمو په یوه ناسته کې د وینا پر وویل، د امریکا په ګډون د ګاونډیو هېوادونو د افغانستان هوايي حریم نقض کړی دی.
ستانکزي زیاته کړې، د ګاونډیانو او امریکا بې پیلوټه الوتکې نه باید د افغانستان پر فضا ګزمې کړي.
دغه راز ستانکزی زیاتوي، اسلامي امارت له ګاونډیو هېوادونو او د نړۍ له ټولو هېوادونو سره د ښه تعامل غوښتونکی دی.
که څه هم نوموړی مني چې په اوسني نظام کې ستونزې شته دي، خو په وینا یې د حل لپاره یې لا زیات وخت ته اړتیا ده.
شېر محمد عباس ستانکزي یو ځل بیا د نجونو زده کړې مهمې وبللې او په هېواد کې یې د نجونو پرمخ له شپږم ټولګي پورته د ښوونځيو او پوهنتونونو د بېرته پرانیستې غوښتنه وکړه.
د هغه په وینا د ښوونځيو دروازې دې له تبعیض پرته د ټولو افغانانو پر مخ چې شرعي او طبیعي حق یې دی، پرانېستل شي.
عباس ستانکزي له دې وړاندې هم د ټولو نجونو پر مخ د ښوونځیو او پوهنتونونو د پرانېستلو غوښتنه کړې، خو لا هم له شپږم ټولګي پورته د نجونو پر مخ د ښوونځیو او پوهنتونونو دروازې تړلې دي.
عباس ستانکزی داسې مهال د افغانستان پر فضا د نورو هېوادونو د بې پیلوټه الوتکو د ګزمې خبره کوي چې له دې وړاندې د ملي دفاع سرپرست وزیر په ګډون د اسلامي امارت یو شمیر نورو چارواکو هم د هېواد د هوايي حریم پر نقض نیوکې کړې دي.
