د امریکا فارن پالیسي مجلې د دغه هېواد پراختیا نړيوالې ادارې (یو.اېس.آی.ډي) د موندنو پر بنسټ ادعاء کړې، چې اسلامي امارت د ملګرو ملتونو اړوند ادارو په چوکاټ کې له اړمنو افغانانو سره، د ترسره کېدونکو مرستو په بهیر کې لاسوهنه کوي.
د فارین پالیسي مجلې په راپور کې ویل شوي چې اسلامي امارت واک ته له رسېدا وروسته د نږدې دوو کلونو په اوږدو کې، د نړيوالو له لوري نقدي مرستو ته د عایداتي سرچینو په سترګه کتلي او په دې مرستو کې یې د سرپرست حکومت د پراخ نفوذ د درلودو خبر ورکړی دی.
د راپور یوه برخه:« ملګري ملتونه اړمنو افغانانو ته د مرستو لپاره د میلیاردونو ډالرو نړیوالو مرستو ساتونکی دی. هلته چې شااوخوا نیمايي نفوس یوازې د ژوندي پاتې کېدو لپاره همدغو مرستو ته په تمه ناست دي. هغه ادارې چې په افغانستان کې د مرستو رسولو مسوولیت لري، د طالبانو له لوري تر شدید نفوذ لاندې دي. طالبان بهرنیو مرستو ته د عایداتي جریان په سترګه ګوري.»
فارین پالیسې د یو.اېس.آی.ډي په حواله لیکلي اسلامي امارت دغه کړنې په خپلې تېرې دورې کې هم په مکرر ډول کړي، خو په خبره یې دا ځل د اسلامي امارت چارواکو دغه کړنه په بېساري ډول زیاته کړې.
د دې ترڅنګ په راپور کې د اسلامي امارت له لوري د نړیوالو مرستو د انحصاري کولو او تر خپل کنټرول راوستلو ادعا هم شوې.
د راپور یوه برخه:« د خیریه موسسو په نړیوالو مرستو کې لاسوهنه او د بودیجې سپړل د طالبانو لپاره نوې خبره نه ده، دوی دغه کار په ۹۰ یمه لسیزه کې د خپل تېر حکومت پرمهال هم کاوه. د ۲۰۲۱زیږدیز کال په اګست کې واک ته تر رسېدو وروسته دغه چاره زیاته شوې. طالبان دغه راز د دې مرستو د انحصاري کولو او تر خپل کنترول لاندې راوستلو هڅه کوي.»
خو د اسلامي امارت ویاند ذبیح الله مجاهد بیا دا ادعاوې ردوي او له حقیقته لرې یې ګڼي.
مجاهد د نړیوالو په بشري مرستو کې د نه لاسوهنې ډاډ ورکوي او دغه ډول تبلیغات له اړمنو افغانانو سره د بشري مرستو کمولو او له افغانستان څخه د مرستندویه بنسټونو د پام اړولو هڅه بولي.
بل پلو شنونکي هم د دغو مرستو د ویش په بهیر کې پر شته فساد ټینګار کوي خو وايي، په يادو مرستو کې لاسوهنه تر ډېره د هغو سیمهییزو مسوړلینو له لوري کیږي، چې د دولتي چارواکو او یا هم د مرستندویه بنسټونو له لوري د ویش واک ورکړل شوی وي.
په بشري مرستو کې د سرپرست حکومت د لاسوهنې او نفوذ پیدا کېدا په تړاو راپورونو داسې مهال دي، چې له دې وړاند هم د ملګرو ملتونو او يو شمېر هېوادونو په بشري مرستو کې د لاسوهنې ادعا شوې ده. هغه څه چې اسلامي امارت يې په کلکه ردوي.
