د ملګرو ملتونو د خوړو نړیوال پروګرام وايي، د افغانستان په یو شمېر ولایتونو کې سختو ناڅاپي سېلابونو لسګونه کسان مړه کړي، ګڼ شمېر یې نور ژوبل کړي او سلګونه کورونه او زیاتې کرنیزې مځکې یې ویجاړې کړې دي.
یاد پروګرام زیاته کړې، ټیمونه یې سېلاب ځپلو سیمو کې دي او په خبره یې وضعیت ارزوي تر څو زیانمنو خلکو ته د خوراکي موادو بېړنۍ مرستې ورسوي.
د کډوالۍ نړیوال سازمان هم پر خپله ټویټر پاڼه لیکلي چې مرستندویه ټیمونه یې سېلاب ځپلو سیمو کې دي ترڅو اوښتي زیانونه مالوم او خلکو ته بېړنۍ مرستې ورسوي.
وروستيو سېلابونو کابل، خوست، غزني، کونړ، پکتیا، نورستان او ننګرهار کې هم خلکو مالي او ځاني زیانونه اړولي خو تر ټولو زیات زیانونه یې د میدان وردګو ولایت په جلریز ولسوالۍ کې اړولي دي.
وروستیو سېلابونو د میدان وردګ په ګډون په بېلابېلو سیمو کې لسګونه کسان مړه کړي او د لسګونه کسانو ټپي کېدو ترڅنګ یې خلکو ته درانه مالي زیانونه هم اړولي دي.
