د ملي دفاع وزارت سرپرست مولوي محمد یعقوب مجاهد له العربيه ټلوېزيون سره په خپلې تازه مرکه کې د ټولګډونه حکومت جوړښت رد کړی دی.
مجاهد ویلي، په افغانستان کې داسې کوم لوری نشته دی چې په دې تړاو دې ورسره خبرې وشي او په خبره یې اوسنیو شرایطو کې د ټولګډونه حکومت جوړښت ته اړتیا نه لېدل کېږي.
مجاهد زیاته کړې:« موږ په افغانستان کې داسې ډله او داسې څوک نه لرو چې له هغوی سره دې خبرې وشي او په اوسنیو شرایطو کې ټولګډونه حکومت ته اړتیا نه لېدل کیږي او که د عادي افغانانو په څیر څوک راځي را دې شي او دلته دې ژوند وکړي.»
مجاهد وايي، له نړۍ سره ښې او پر متقابل احترام ولاړې اړیکې غواړي، پر دې سربېره يې غوښتنه کړې، چې نړیوال او ځواکمن اسلامي هېوادونه دې د افغانستان حکومت پر رسمیت وپيژني.
هغه زیاته کړې:« کله چې یو حکومت رامنځ ته شي او هرڅه ولري نو باید پر رسمیت وپيژندل شي او په ځانګړې توګه قوي اسلامي هېوادونه هغه باید موږ پر رسمیت وپيژني.»
د ملي دفاع وزارت سرپرست د پاکستان هغه ادعاء چې ګنې ټي.ټي.پي په افغانستان کې فعالیت لري بې بنسټه یاده کړه او زیاته يې کړه، چې دا یوه داسې هڅه ده چې غواړي افغانستان داسې ښکاره کړي چې ګواکې خپلې ژمنې نه عملي کوي .
هغه زیاتوي:« موږ د پاکستاني طالبانو تائید نه دی کړی او نه مو تمویل او نورو برخو کې چا سره مرسته کړې. دا ادعاء د دې لپاره ده، چې ووايي اسلامي امارت خپلو ژمنو ته تعهد نه لري او دا د دې لپاره یوه هڅه ده چې کیږي.»
په دې وروستیو پاکستاني چارواکو اندیښنه ښودلې ده چې د ټي.ټي.پي غړي په افغانستان کې ازاد فعالیت لري او دوی ته ترې ګواښ متوجه دی، خو اسلامي امارت دغه تورونه رد وي او زیاتوي چې په افغانستان کې هېڅ وسله واله ډله چې نورو ته ګواښ وي او یاهم افغان خاوره د هېوادونو پر وړاندې وکاروي حضور نه لري.
