څو ورځې وړاندې د امریکا ولسمشر جوبایډن خبریالانو ته وویل، د ترهګرۍ له پلوه افغانستان نور ګواښ نه دی او زیاته یې کړه، چې په دغه هېواد کې القاعده او نورې ترهګرۍ شبکې له منځه تللي دي.
جو بایډن داهم ویلي، چې افغانستان د نړیوالو ترهګرو شبکو لپاره خوندي ځای نه دی.
خو برعکس بیا د امریکا کانګریس ځینو غړو اندیښنه ښودلې چې په افغانستان کې ترهګرۍ د ودې په حال کې ده او اوس د ترهګرۍ پرځاله بدل شوی دی.
د افغانستان پر وړاندې د واشنګټن دغه پاشلي دریځ ته د کابل غبرګون دادی چې باید امریکايي سیاستوال او چارواکي د افغانستان پر وړاندې واحد دریځ غوره کړي او دا دټولو پر ګټه دی.
د اسلامي امارت ویاند ذبیح الله مجاهد وايي، هغه امریکايي چارواکي اوسیاستوال چې په افغانستان کې د ترهګرۍ د ودې اندیښنې مطرح کوي په جګړه کې یې شخصي ګټې درلودې او اوس چې په افغانستان کې جګړه پایته رسیدلې یادو امریکایانو خپلې ګټې له لاسه ورکړي.
مجاهد زیاته کړې:« د امریکا په کانګرس او سیاسي اډانه کې ځینې جنګ طلبه کړۍ هم شته دي. هغوی ښايي هغه د جنګ د وخت منافع له لاسه ورکړي وي. د دوی له خوا چې افغانستان اشغال شوی وه،ډېر زیات نظامي مصارف کېدل، همدا راز زیاتې پیسې مصرف کېدې او افغانستان ته انتقال کېدې. دوی هغه پیسې او ګټې وټې شخصي له لاسه ورکړي او بیا د جنګ خبرې کوي او دلته د ګواښ او ستونزو خبره کوي. واقعیت دا دی چې افغانستان هېچا ته اجازه نه ورکوي، چې خاوره یې د چا پر ضد وکارول شي. اسلامي امارت په دې برخه کې خپل تصمیم لري او دا د ملي ګټو موافق تصمیم دی. دا د اسلامي امارت ستراتیژي ده نو باید په دې اړه څوک اندېښنه ونه لري. امریکایان باید د افغانستان په اړه خپل دریځ واحد کړي. »
ذبیح الله مجاهد وايي، له بل هر وخت اوس په افغانستان کې امنیت ټینګ دی او خلک په سوله ییزه فضا کې ژوند کوي نو د هېوادونو په ګټه به دا وي چې د تخریب پرځای د افغانستان له ثبات سره مرسته وکړي.
اخوا د سیاسي چارو کارپوهان بیا په دې اند دي چې د افغانستان پر وړاندې د امریکا دوه مخی او بې ثباته سیاست نوره پایله نه ورکوي او واشنګټن دې د کابل پر وړاندې په خپل اوسني دریځ کې بدلون راولي.
دوی وايي، د هغه وخت پرتله چې په زرګونو امریکایي ځواکونو په افغانستان کې حضور درلود اوس امنیت ټينګ دی او بهرنۍ وسله والې ډلې هم د افغانستان په خاوره کې حضور نه لري .
د سیاسي چارو کارپوه سرور نیازی وايي:« د امریکا کانګرس په هغه اندازه چې د افغانستان په اړه کوم تشوېش لري ، دا له واقعیت لرې دی. دلته له پخوا یعنی هغه وخت کې چې امریکایان دلته ول، اوس امنیت هم ډاډمن دی. د ترهګرو ډلو فعالیتونه او شتون یې هم په افغانستان کې ډېر راکم شوی دی.»
په تیرو دوه کلونو کې نه یوازې دا چې د کابل او واشنګټن ترمنځ اړیکې عادې نه شوې بلکې دواړو لوریو پر یوبل د دوحې له تړونه د سرغړونې تورونه پورې کړل او تازه هم د ترهګرۍ د ودې په تړاندیښنې چې د امریکا کانګریس غړو مطرح کړي دي ، کتونکي بیا په دې باور دي چې د فشارونو سیاست پایله نه ورکوي او امریکا باید تعامل ته د رسیدو لپاره له کابل سره خبرې پیل کړي.
