د اسلامي امارت له بيا واکمنیدو سره سم د ۲۰۲۲ کال په اپرېل کې د یوه حکم له مخې، د نشه يي توکو پر کرکيله بنديز ولګېد او کروندګر د سرغړونې په صورت کې پر مجازاتو وننګول شول.
تازه د برېټانیا ټلېګراف ورځپاڼې په خپل راپور کې افغانستان کې د نشه يي توکو پر وړاندې د سرپرست حکومت مبارزه بریالۍ ګڼلې او ویلي دي د تېر کال پرتله په افغانستان کې د کوکنارو حاصلات ۸۰ سنله کم شوي دي.
د راپور یوه برخه:« تېر کال په افغانستان کې د کوکنارو حاصلات۸۰ سلنه کم شوي ځکه چې طالبانو د کوکنارو ډېری فصلونه له منځه وړي او د کوکنارو کروندګرو او مجرمینو ته سزا ورکوي.»
د ورځپاڼې د راپور له مخې، وړاندې کلونه د افغانستان څلور پر پنځمه برخه کوکنار یوازې په هلمند کې کرل کیدل او د سپوږمکۍ په وسيله له ترلاسه شویو انځورونو ښکاري، چې په دې ولایت کې تېر کال ۳۲۰ زره جرېبه ځکه کې کوکنار کرل شوي وو، خو سږ کال دا اندازه ۲۵۰۰ جرېبو ته راښکته شوې ده.
د راپور یوه برخه:« یو وخت په هلمند کې د افغانستان د کوکنارو شااوخوا څلور پر پنځمه برخه تولیدېده. د سپوږمکۍ د انځورونو له مخې سږ کال یوازې شااوخوا ۲۵۰۰ جرېبه ځمکه کې کوکنار کرل شوي. په داسې حال کې چې تېر کال د اټکل له مخې پر ۳۲۰ زره جرېبه ځمکه کوکنار کرل شوي وو.»
د نشهيي توکو یوه برېتانوي کارپوه هیري شاپيرو له ټلېګراف ورځپانې سره خبرو کې له يادو توکو سره د سرپرست حکومت مبارزه د بشر په تاریخ کې بریالۍ بللې.
هغه زیاته کړې:« د طالبانو لخوا د نشهيي توکو پر وړاندې مبارزه د بشر په تاریخ کې تر ټولو بریالۍ هڅې دي، خو زه فکر کوم اندیښنه به دا وي، که هیروین د پام وړ کم شي او تر راتلونکي کال پورې په بازار کې ت لاسه نه شي، نو ډېری فینټینیل به سیسټم ته راشي. که چیرې فینټینیل او نور ورته توکي بازار ته وړاندې کیږي نو د روږدي کیدو پر ځای مړینه زیاتیږي. خلک تر څو ورځو پر هیرویینو نه روږدي کېږي، خو د فینټینیل لومړي وار استفاده وروستۍ هم ده.»
د ټلېګراف په راپور کې دا اندېښنه هم ښودل شوې، چې د کوکنارو پر وړاندې د مبارزې له امله به ډېری افغانان بې روزګاره شي او اړ کېږي څو خپل هېواد پریږدي.
سرپرست حکومت که څه هم دې راپور ته غبرګون نه دی ښودلی، خو وړاندې یې ویلي چې کرونګرو ته به اصلاح شوي تخمونه د کوکنارو د بدیل په توګه ورکړي.
