مجاهد: د القاعده ډلې په تړاو د بایډن څرګندونې د ا.ا د ژمنو پوره کولو تصدیق دی

 د القاعده شبکې پر وړاندې د افغانستان سرپرست حکومت د دریځ په تړاو د امریکا د ولسمشر جو بایډن څرګندونو په کور دننه بېلابېل غبرګونونه لرلي.

که څه هم سرپرست حکومت له امریکا سره د دوحې په هوکړه کې د هر راز پټو مادو شتون په کلکه ردوي؛ خو د ملي امنیت پخواني مشر رحمت الله نبیل د امریکا د ولسمشر دغه څرګندونې، د دې هېواد او اسلامي ‌امارت ترمنځ د دوحې هوکړې د پټو بندونو یوه برخه بللې او اسلامي امارت یې په سیمه کې د د امريکا نيابتي ډله بللې ده.

نبیل زیاته کړې:« ولسمشر بایډن د دوحې هوکړې د پټو ضمایمو په افشا کولو سره یو بنسټیز کار وکړ او له دې سره یې په سیمه کې د واګنر ګروپ په توګه د طالبانو ماهیت لا روښانه کړ.»

د  اسلامي امارت ویاند ذبیح الله مجاهد بیا د امریکا ولسمشر جوبایډن څرګندونې خپلو هغو ژمنو ته پابندي او د پوره کولو تائید بولي، چې له امریکا سره يې د ترهګرۍ پر وړاندې د مبارزې په برخه کې کړې دي.

مجاهد زیاته کړې:« د جو بایډن خبرې د اسلامي امارت اعلان شویو ژمنو ته پابندي ثابتوي. د جوبایډن خېلو غلامي خو هغه وه چې د هغو مسلحو ځواکونو د پېشقرول رول دې لوبوه. زرګونه امریکایي لښکر دې په کور کې ګرځیدل، د غلامۍ په بدل کې دې ډالري امتیازات ورڅخه اخېستل او په مقابل کې دې پوره ۲۰ کاله د خپل مسلمان ورور په کور د چاپې، بمبار، وحشت او ظلمونو جاسوسي کوله.»

د افغانستان د سولې لپاره د امریکا پخوانی ځانګړی استازی زلمی خلیلزاد د جو بایډن د خبرو په تائید په افغانستان کې د القاعدې ډلې پراخ حضور ردوي او یاده ډله د دې جوګه نه بولي چې له افغانستانه بهر په نورو هېوادونو کې بریدونه ترسره کړي.

هغه زیاته کړې:« القاعده په افغانستان کې ډېرې لږې زیربناوې لري. دا شونې نه ده چې دغه ډله دې تر را روان زېږدیز کال پورې د دې وړتیا ولري، چې له دې هېواده بهر په مستقیم ډول پر نورو هېوادونو کې خپل بریدونه تنظیم کړي.»

د القاعده شبکې په تړاو د امریکا د ولسمشر جوبایډن څرګندونې داسې مهال دي، چې له دې وړاندې د نړیوالې ټولنې، د سیمې او ګاونډ هېوادونو استازو نږدې په هره ناسته کې پر سرپرست حکومت د ترهګرو ډلو د ملاتړ او په افغانستان کې یې د حضور تور پورې کاوه.