ویلټنګر هیلف موسسه: افغانستان کې خپلو مرستو ته دوام ورکوو

د جرمني ویلتنګرهیلف موسسې ویلي، چې د اسلامي امارت له محدودیتونو سره سره په افغانستان کې د مرستو رسونې چارو ته دوام ورکوي.

د ډي.پي.اې اژانس راپور ورکړی،چې د ویلتنګرهیلف په نوم دغې موسسې پرون په یوه خبرپاڼه کې دا خبره کړې ده.

یادې موسسې ویلي، کله چې دسمبر میاشت کې اسلامي امارت په نادولتي موسسو کې د ښځو پر کار بندیز ولګاوه، دوی د لنډمهال لپاره، د فبرورۍ تر نیمایي پورې خپلې پروژې وځنډولې.

دغه راز یادې موسسې ویلي،د اسلامي امارت له چارواکو سره تر خبرو وروسته هوډ لري، چې خپل فعالیتونه بېرته پیل او مرستو ته دوام ورکړي.