د افغانستان لپاره د امریکا متحده ایالتو ځانګړی استازی توماس وېسټ قطر، متحده عرب اماراتو او ترکیې ته په سفر وتلی دی.
د یاد هېواد بهرنیو چارو و زارت په خبره، وېسټ به په دغو هېوادونو کې د میشتو افغانانو ترڅنګ د یادو هېوادونو له چارواکو سره هم د افغانستان په تړاو خبرې وکړي.
وېسټ به د دغه سفر پرمهال له پخوانیو افغان سیاسي څيرو سره، مدني فعالانو، ژورنالیستانو او د بشرحقونو له فعلانو سره پر بېلا بېلو موضوعاتو خبرې وکړي.
خو د سیاسي چارو تحلیل کوونکي بیا په دې باور دي،چې له تکراري څېرو سره خبرې هېڅ ځای نه نیسي او د امریکا متحده ایالت باید په مستقیم ډول د افغانستان د اوسني حکومت له مشرانو سره خبرې وکړي.
د سیاسی چارو تحلیل کوونکی عمر نهضت وايي:«که د امریکا متحده ایالت غواړي،چې د افغانستان د بحران ختمېدو لپاره خبرې وکړي، نو د دې پرځای چې له تکراري څېرو او د بحران د عامل کسانو سره له هېواد بهر خبرې وکړي، نو رادېشي په داخل د افغانستان کې دې له تازه سیاسي څیرو،چې برنامه او طرحه لري خبرې وکړي اوهمداراز له اسلامي امارت سره دې خبرې وکړي ،خو نه غواړي چې مسله حل شي.»
تحلیل کوونکي وايي، د توماس وېسټ دغه سفرونه د دې پرځای، چې ستونزه حل کړي، بحران نور هم پراخه کوي.
دوی وایې،غوښتنه یې داده، که د امریکامتحده ایالت غواړي ،چې په واقعي توګه د افغانستان ستونزه حل کړي،نو د اسلامي امارت له چارواکو سره دې له نږدې کیني او له درېیمو هېوادونو او پخوانیو څيرو دې تیر شي.
د سیاسي چارو تحلیل کوونکی امان الله هوتکي وايي:« زه فکر کوم، توماس وېسټ چې ګرځي د افغانستان مسله نه خلاصوي، بلکې د افغانستان مسله نوره هم جنجالي کوي. که واقعآ هم د امریکا متحده ایالت غواړي،چې د افغانستان مسلې ته د پای ټکی کیږدي،نو رادېشي د اسلامي امارت له مسوولینو سره دې خبرې وکړي،چې دا مسله حل شي،خو په دې سفرونو چې کله دوحې او دوبي او ترکیې ته ځي دا مسله نه حل کیږي.»
خو ځینې نور بیا له پخوانیو سیاسیونو سره خبرې او د افغانستان په قضیه کې د دوی ښکیل ساتل مهم ګڼي او زیاتوي،چې امریکا دې له دواړو سره هم د افغانستان له سرپرست حکومت او هم له هېواده بهر سیاسیونو سره خبرو ته دوام ورکړي، ترهغې چې په افغانستان کې ولس منلی حکومت رامنځ ته شي،
د سیاسي چارو فعال کمال ناصر اصولي وايي:« داچې وېسټ له افغان سیاسیونو سره وګوري، د افغانستان په اړه دا ښه خبره ده،ځکه تراوسه په افغانستان کې ولس منلی دولت نه دی جوړ شوی،نو ښه داده چې د امریکامتحده ایالت او نړیوال هم له اوسني سرپرست حکومت سره خبرې وکړي او له خورو ورو سیاسيونو سره چې په افغانستان کې پر یو ولس منلي دولت رامنځ ته کولو توافق ته ورسیږي.»
د سیاسي چارو تحلیل کوونکی عزیز معارج بیا وايي، د امریکا متحده ایالت غواړي،چې د خپلو موخو لپاره یو ځل بیا په دوحه کې بین الافغاني مذاکراتو پیل کړي او هغو ته زیاته ترجع ورکوي،چې د دوی ګټې خوندي ساتي.
معارج زیاته کړه:« د امریکا متحده ایالت له خپلو متحدینو سره هڅه کوي،چې د افغانستان مسلې د حل لپاره بین الافغاني مذاکرات بیا په دوحه کې پیل کړي او د خپلو اهدافو لپاره زیاته صادقه نه ده او هغو کسانو ته مراجعه کوي،چې د امریکامتحده ایالتو ګټې خوندي ساتي او هغه پخواني سیاسیون،چې اوس له افغانستانه وتلي،خو دامریکا د ګټو خوندي کولو لپاره وفاداره دي.»
د امریکا متحده ایالتو بهرنیو چارو وزارت په دې تړاو خپره کړې اعلامیه کې ویلي، چې توماس وېسټ به د روانې اپریل میاشتې تر ۱۸ مې نیټې به یادو هېوادونو کې له ځايي چارواکو او میشتو افغانانوسره لیدنې ولري.
