د ا.ا له لوري د ملګرو ملتونو په اړوند ادارو کې د افغان ښځینه کارکوونکو پر کار د بندیز په پرېکړه د غبرګونونو په دوام د افغانستان د بشر حقونو لپاره د ملګرو ملتونو د ځانګړي راپور ورکوونکي ریچارډ بېنېټ په ګډون د یاد سازمان کارپوهان وايي، ا.ا باید د افغان ښځو په نښه کول ودروي.
د ملګرو ملتونو کارپوهانو په یوه بیان کې ویلي، ا.ا دې ژر تر ژره خپله دغه پرېکړه بېرته واخلي، ځکه د دوی په وینا د ښځو او نجونو په نښه کولو، حذفولو او منزوي کولو دوام د ټولو افغانانو ژوند او د افغانستان راتلونکی له خطر سره مخ کوي.
دوی خبرداری ورکوي،چې د ا.ا دغه بندیز به پر افغانانو او بشري چارو ناوړه اغېزې ولري او دغه راز ميلیونونه هغو افغانانو ته به د بشري مرستو رسول زیانمن کړي،چې بېړنیو مرستو ته اړتیا لري.
دوی وايي، وروستی بندیز د ښځو پر وړاندې غیر قانوني تبعیض او پر ښځو مستقیم برید دی،چې په بشپړ ډول د ملګرو ملتونو د منشور، د بشري حقونو د نړیوالې اعلامیې او د بشري حقونو د نړیوالو تړونونو له اساسي ارزښتونو او اصولو سره په ټکر کې دی.
د نورو پراخو غبرګونونو ترڅنګ د اسلامي همکاریو سازمان هم په یوه اعلامیه کې د دغې پرېکړې په تړاو اندېښنه ښودلې او ویلي یې دي، چې د دې محدودیتونه پایلې نه یوازې افغان ښځې زیانمنوي؛ بلکې د ملګرو ملتونو د مرستو رسولو بهیر هم ټکنی کوي.
