د ملګرو ملتونو د بشري حقونو کارپوهانو یوه خبرپاڼه کې له اسلامي امارت غوښتي دي، ترڅو د نوي ښوونیز کال په پیل سره ټول افغانستان کې تعلمي مرکزونه پرانیزي او د ټولو لپاره له نړیوالو معیارونو سره سم د زده کړو زمینه برابره کړي.
د خبرپاڼې یوه برخه:« موږ پر طالب چارواکو غږ کوو،ترڅو ژر تر ژره د ۲۰۲۳ کال د مارچ په ۲۲ نیټه ټول افغانستان کې د نجونو پرمخ ښوونځي او پوهنتونونه پرانیزي، ټولو نجونو او هلکانو ته له نړیوالو معیارونو سره سم د زده کړو زمینه برابره، تعلمي برخه کې پر ښځینه کارماندانو ټول محدودیتونه لرې او نجونو ته د زده کړو خوندي چاپیریال برابر کړي. د دې هیلې پرځای داسې ښکاري،چې د دویم پرله پسې ښوونیز کال لپاره به نجونې له زده کړو محرومې وي.»
د اسلامي امارت ترڅنګ دغو کارپوهانو پر نړیواله ټولنه هم غږ کړی دی، ترڅو د اسلامي امارت له چاروکو ورته غوښتنه وکړي او افغانستان کې دې د رسمي ښوونیز سیسټم مالي ملاتړ وکړي.
دوی ویلي، یوازې د ښوونځیو پرانېستل بسنه نه کوي، بلکې د زده کړو کیفیت ته هم باید پام وشي او د مسلکي ښوونکو ګومارنه دې په نظر کې ونیول شي.
د خبرپاڼې یوه برخه:« ان که دا بندیز بېرته واخېستل هم شي، موږ بیا هم د زده کړو د کیفیت په اړه اندیښمن یو،چې د نجونو او هلکانو لپاره به يې زمینه برابره شي. د هلکانو د ثانوي ښوونځیو څخه داسې ځورونکي راپورونه تر لاسه شوي،چې د وړ مسلکي ښوونکو پر ځای دیني ښوونکي ګومارل شوي او د ښوونځيو په نصاب کې د پام وړ بدلون راوستل شوی دی،چې ځینې اصلي مضامین لرې شوي دي.»
خبرپاڼه کې وړاندې راغلي،چې په افغانستان کې د اوس لپاره د ښځو او نجونو لپاره د لیدو کتو او زده کړو خوندي ځای نشته دی.
خبرپاڼه کې ویل شوي،که وضعیت همداشان دوام وکړي،د افغانانو په ژوند به بدې اغیزې وکړي او د ښونیز سیسټم بیارغونه به لسیزې وخت ونیسي.
د خبرپاڼې یوه برخه:« افغانستان کې اوس د نجونو لپارهېڅ داسې خوندي ځای نشته دی،چې په کې په ازاد ډول زده کړې وکړي یا له یو بل سره وګوري. که پر زده کړو بندیز همداشان دوام وکړي، نو په ځانګړي ډول د نجونو او همدرانګه د ماشومانو په ژوند به منفي اغیزې وکړي او بیا رغونه به یې لسیزې وخت ونیسي،چې موږ اجازه نه ورکو دا پیښ شي.»
دا لومړی ځل نه دی،چې نړیوال دا ډول غوښتنې کوي او د زده کړو د بهیر په تړاو اندېښنې وړاندې کوي،بلکې له دې وړاندې هم بار بار دا ډول غوښتنې شوې دي.
که څه هم اسلامي امارت دا پریکړې موقتي بولي او ډاډ یې ورکړی دی،چې ژر به ښوونځي پرانیزي،خو د نوي ښوونیز کال له پیل سر سم لا هم د نجونو پر مخ د ښوونځیو او پوهنتونونو د پرانېستلو کومه تمه او هېله نشته دی.
