د پاکستان بهرنیو چارو وزیر بلاول بوټو زرداري خپلو تازه څرګندونو کې یوځل بیا ویلي،چې غواړي له کابل سره خبرې وکړي،چې دالقاعدې او داعش ترڅنګ د ټولو وسلهوالو ډلو پر وړاندې مبارزه وکړي.
په ورته مهال زرداري دا نیوکه یوځل بیا کړې،چې افغانستان ثابت پوځ ، د ترهګرۍ ضد ځواک او د پولو مدیریت ځواکونه نه لري.
هغه زیاته کړې:« پاکستان غواړي طالبان وګوري،چې د القاعدې او داعش په ګډون د ټولو ترهګرو ډلو پر ضد مبارزه وکړي،خو په دې برخه کې د طالبانو د ظرفیت په اړه پوښتنې شته دي،ځکه دوی ثابت پوځ، د ترهګرۍ ضد ځواک او د پولو د مدیریت ځواکونه نه لري. پاکستان تل ویلي،چې د ترهګرو ځپلو او زده کړو او کار ته د ښځو لاسرسي برخه کې له طالبانو سره تعامل وکړي.»
خواسلامي امارت بیا له وړاندې د پاکستان دغه ادعا رد کړي،چې ګني افغانستان ځواک نه لري .
ملي دفاع وزارت ویلي، افغان وسله وال پوځ یو منظم او په هر ډول وسلو سمبال ځواک دی، هم له خپلې خاورې د دفاع او هم د سرحدونو کنټرول وړتیا او ظرفیت لري،چې چاته به اجازه ورنه کړي چې پرافغانستان یرغل وکړي.
د سیاسي چارو شنونکي بیا وايي، پاکستان دې خپلې کورنۍ ستونزه کې افغانستان نه ښکېلوي او خپلې شخړې دې پهخپله حل کړي.
د سیاسي چارو شنونکی هاتف مختار وايي:« د ټي.ټي.پي مسله د پاکستان کورنۍ موضوع ده، چې افغانستان او اوسني نظام پورې یې هېڅ اړه نه لري. غوره لار داده،چې پاکستان دې خپله کورنۍ موضوع خپله حل کړي.»
څه موده وړاندې هم چې په پاکستان کې بریدونه وشول،د دغه هېواد چارواکو ادعا کړې وه،چې د ټي.ټي.پي مشران په افغانستان کې دي او باید کابل یې مخنیوي وکړي.
هماغه مهال د اسلامي امارت چارواکو ورته توند غبرګون وښود ، بهرنیو چارو وزارت سرپرست مولوي امیرخان متقي له پاکستان وغوښتل،چې د خپل بام واوره دې پر بل نه غورځوي او چاته اجازه هم نه ورکوي،چې د افغانستان له خاورې دې بل ته زیان ورسوي.
