د افغانستان لپاره د امریکا ځانګړي استازي توماس وېسټ په خپلو تازه څرګندونو کې ویلي، په ملګرو ملتونو کې د افغانستان دڅوکۍ د ورکړې ، دکنګل شوې پانګې او د سیاسي تعامل پر سر له افغان حکومت سره خبرې ترهغې ناممکنې دي،چې د رسمیت ترلاسه کولو او یو شمیر نورو مسایلو په برخه کې چې په دې تړاو یې زیات جزئیات نه دي ورکړي عملي ګامونه نه وي اخېستي .
اسلامي امارت بیا له وړاندې ویلي، د رسمیت پیژندنې لپاره یې ټول هغه معیارونه چې اړتیا ده پوره کړي دي او کنګل شوې پیسې د افغانانو حق دی او باید ورکړل شي.
د اسلامي امارت ویاند ذبیح الله مجاهد وايي، نړیوالو بندیزونو، د پانګې کنګل او پر بانکونو لګېدو بندیزونو اغیزې لاهم محسوسې دي .
مجاهد زیاته کړې:« نړیوال بندیزونه دي، زموږ پانګه د امریکا له خوانه بنده شوې ده موثرې مرستې هم نه دي شوې، بانکونو باندې هم بندیزونه دي،چې خپل تاثرات لري.»
