هغه زیاته کړې:« موږ۱۰ کاله مخکې د ترهګرو پر ضد عملیات پیل کړل،چې پیل یې له صوات څخه وشو او پایله کې یې د کراچۍ په څېر لویو ښارونو کې امنیت ټنیګ شو. اوس چې له افغانستانه د ناټو ځواکونه ووتل او طالبان حاکم شول،پایله کې یې د پاکستان په خاوره کې د ترهګرو فعالیت پیل شو او شمېر یې زیات شو. موږ افغانستان کې سوله غواړو او د دوحې هوکړه کې هم ویل شوي،چې د افغانستان خاوره به د پاکستان په شمول د نورو هېوادونو پر ضد نه کارول کېږي،خو بیا هم دا خلک د افغانستان خاوره د پاکستان پر ضد په ځانګړې توګه دلته او بلوچستان کې کاروي. موږ به له کابل سره ژر اړیکه او خبرې وکړو،تر څو دا خلک چې دوی ته نیږدې دي، کنټرول یې کړي.»
ټي ټي پي له دې وړاندې د پاکستان د ورته څرګندونو په اړه ویلي ول،چې په پاکستان کې فعالیت کوي او اړ نه دي، چې په افغانستان یا کومه بله جغرافیه کې ځان ځای پر ځای کړي.
د افغانستان ملي دفاع وزارت بیا د پاکستان د دفاع وزیر یادې څرګندونې ردوي او ډاډ ورکوي،چې خاوره به یې د سیمې او نړۍ د کوم هېواد پر ضد ونه کارول شي.
یاد وزارت زیاته کړې:« موږ د پاکستان د دفاع وزیر خواجه آصف وروستۍ ادعاوې په کلکه ردوو،چې ګواکې د افغانستان خاوره د پاکستان پر ضد کارول شوې. له دې وړاندې ټي ټي پي په ځلونو منلې ده،چې د دوی فعالیت په پاکستان کې دی او اړ نه دي،چې افغانستان یا له بلې جغرافیې خپل فعالیتونه وکړي. د افغانستان اسلامي امارت د سیمې او نړۍ هېوادونو ته ډاډ ورکوي،چې خاوره به یې د چا پر ضد نه کارول کېږي.»
