ټاکل شوې ده،چې ملګري ملتونه به نن دوشنبه د افغانستان په تړاو ناسته ولري او د افغان نجونواو ښځو پر حقونو لګېدلو بندیزونو په تړاو به په کې بحثونه وکړي او خپلې اندیښنې به شریکې کړي .
په بشري چارو کې د ملګرو ملتونو د همغږۍ مشر مارټين ګریفیټس پر مشرۍ پلاوی،چې څو ورځې وړاندې کابل ته راغلی،د ملګرو ملتونو دغې ناستې ته به د خپل سفر راپور هم وړاندې کړي.
د سیاسي چارو کارپوهان په دې اند دي،چې نړیوال به له نویو لارو چارو پر افغان حکومت خپل فشارونه زیات کړي اوموخه به یې هم د ښځوحقونو ساتلو ته د افغان چارواکو متوجه کول وي.
دوی وايي، اوس اسلامي امارت ته په کار دي،چې له نړۍ سره د رسمي اړیکو د ټينګښت لپاره پرهغو مسایلو او شرایطو هوکړه وکړي،چې اسلامي او افغاني ارزښتونه اجازه ورکوي .
د پوهنتون استاد فیض محمد ځلاند وايي:« نړۍ به له نویو لارو پر اسلامي امارت باندې فشارونه زیات کړي،چې د اسلامي امارت مشران دې ته اړ کړي،چې د ښځو حقونو ساتلو کې ټول شموله حکومت په رامنځ ته کولو کې په لویه کې د سیاسي او ټولنیز ثبات د رامنځ ته کولو په برخه کې خپل مسوولیتونه ښه وپيژني او ادا یې کړي. اسلامي امارت ته په کار ده، چې له نړۍ سره د تعامل لپاره په هغو مسایلو او شرایطو هوکړې ته ورسیږي،چې کلتور دود او دین اجازه ورکوي.»
ځينې بیا وايي،ملګري ملتونه دې د خپلو قوانیونو پر اساس هېوادونو ته حق ورکړي،چې د خپلو ارزښتونو اعتقادونو پر اساس نظامونه جوړ کړي او د فشار مسله نوره پایله نه ورکوي او نه هم د منلو ده .
دوی وايي، له نړۍ غوښتنه دا ده،چې د فشارونو پرځای دې له افغانستان سره د خبرو او تفاهم پر مسلې فکر وشي او نړۍ دې له همدې لارې له افغان حکومت سره مخته لاړه شي .
د سیاسي چارو کارپوه هاتف مختار وايي:« ملګري ملتونه دې خپلو قوانینو ته مراجعه وکړي، هېوادونو ته دې حق ورکړي،چې د خپلو ارزښتونو، اعتقادونو په رڼا کې یو نظام ولري. د فشار موضوع په افغانستان کې نور د منلو نه ده او نه یې دغه ملت توان لري. غوره لار داده،چې ملګري ملتونه دې د اسلامي امارت مشران له تور لیست وباسي او د خبرو او تفاهم لړۍ دې پیل کړي.»
