د بهرنیو چارو وزارت سرپرست امیر خان متقي دغه څرګندونې د ملګرو ملتونو د عمومي منشي مرستیالې امینې محمد په مشرۍ له پلاوي سره په کتنه کې کړې دي.
په دې کتنه کې د ملګرو ملتونو د عمومي منشي مرستیالې امینې محمد ویلي، افغانستان ته يې د سفر موخه وضعیت له نږدې لیدل او د افغان نجونو د زده کړو او کار په اړه افغان حکومت ته د نړیوالې ټولنې پیغام رسول دي.
د محمد په خبره، ملګري ملتونه او نړیواله ټولنه له افغانستان سره د خپلو مرستو او د تعامل پر دوام تمرکز کوي.
یاده کتنه کې متقي ویلي، دا مهال په زیاته اندازه ښځي په تعلیمي او روغتیايي برخو کې په کار بوختې دي او کومو ښځو چې دفترونو کې کار کاوه ټولو ته يې معاشونه رسول کېږي.
د متقي په وینا، د اسلامي امارت په رسمیت نه پېژندنه، په لوړ پوړو چارواکو د سفري بندیزونو نه لرې کېدل او پر بانکي سیستم بندیزونه هغه عوامل دي چې افغانان یې له ګڼو ستونزو سره مخ کړي او نړیواله ټولنه باید د دغو ستونزو په اړه مثبت ګامونه واخلي.
