د اسلامي همکاریو سازمان مشر حسین ابراهیم طه ویلي،چې د دیني عالمانو یو پلاوی یې کابل ته ځي او هلته به له افغان چارواکو سره د نجونو پر زده کړو او د ښځو پر کار د لګول شویو محدودیتونو پرسر خبرې وکړي.
د سیاسي چارو شنونکي بیا د اسلامي همکاریو سازمان یو مهم پلټ فارم بولي او په باور یې کابل ته به یې د پلاوي راتګ اغیزمن وي، خو پر وینا یې اسلامي امارت ته په کار ده، چې د ښځو د زده کړو په برخه کې د اسلامي نړۍ قناعت ترلاسه کړي.
دوی وايي، اسلامي امارت باید د اسلامي همکاریو سازمان سره تعامل ته ورسیږي او له دغه سازمان سره اړیکې د افغانستان پر ګټه دي.
د سیاسي چارو شنونکی عزیز معارج وايي:«ترهغې،چې د افغانستان ستونزه خپله افغانان او طالبان حل نه کړي، دا سازمان هېڅ نه شي کولی،خو یو څه به وکړي،چې یو فرصت به رامنځ ته کړي او طالبان باید ترې ګټه واخلي، اصلاحات راولي او خپلو وروستیو دریځونو کې نرمښت ښکاره کړي،چې ورسره به د افغانانو ستونزې حل شي او او څه به یې له نړۍ سره اړیکې ټېنګې شي.»
د سیاسي چارو شنونکی زمان ګل دهاتي بیا وايي،د اسلامي همکایو سازمان ته په نړۍ کې د لوی اقتصادي او سیاسي ځواک په سترګه کتل کیږي او په خبره یې دغه سازمان کولی شي،چې د افغانستان حکومت او غربي نړۍ ترمنځ واټن راکم کړي او د اړیکو په ښه کېدو کې یې اغیزمن رول ولوبوي.
دهاتي زیاته کړې:«د اسلامي همکاریو سازماند لوي اقتصادي، سیاسي او فرهنګي قدرت لرونکی دی او که په ریښتینې توګه وغواړي او هلې ځلې وکړي،نو د اسلامي امارت او غربي نړۍ ترمنځ به دا واټن کم کړي او د اړیکو د ښه کېدو لپاره به ډېر ګټور تمام شي.»
له هغې وروسته،چې اسلامي امارت د نجونونو پر مخ د پوهنتونونه دروازې وتړلې او په غیر دولتي کورنیو او بهرنیو موسسو کې یې د ښځو پر کار بندیز ولګاوه، د نړیوالو ترڅنګ یې د اسلامي همکاریو سازمان او هېوادونو توند غبرګونونه هم راوپارول.
یاد سازمان یوه اوونۍ وړاندې د سعودي عربستان پلازمینه ریاض کې په دې تړاو ناسته وکړه او د اسلامي امارت وروستۍ پرېکړې یې غیر اصولي وبللې.
