Skip to content
د روغتیا نړیوال سازمان د سې شنبې په ورځ د ۲۰۲۲ زېږدیز کال په لړ کې افغانستان کې د خپلو ټولو فعالیتونو راپور خپور کړی او په سر کې یې ژمنه کړې،چې په دغه هېواد کې به د خلکو لپاره خدمات لا پراخه کړي.
په راپور کې ویل شوي،چې د نورو کلونو پرتله تېر کال ورسره د ملګرو ملتونو اړوندو ادارو، بشري سازمانونو، مرستندویه هېوادونو او افغاني انجوګانو ډېر سخاوت کړی دی،چې له امله یې د دوی خدمات هم د پام وړ پراخه ول.
دغه راز په راپور کې ویلي،چې ساحې ته په کتو، د ډېرو روغتیايي خدماتو رسول په دې مانا دي،چې روغتیایي ستونزې او د افغانانو ژوند ته ورپېښ ګواښونه هم ډېر ول.
د راپور یوه برخه:« د شري له امله اغیزمن کسان: ۷۷ زره ۲۱۰
د شدید نس ناستي پېښې: ۲۴۲ زره ۵۶۲
د ډنګي تبې پېښې: ۱۲۶۶
د کورونا مثبتې پېښې: ۲۰۷ زره ۶۱۶
د جون میاشتې شدیدې زلزلې له امله مړي شوي: ۱۰۰۰ کسان
د هېواد پر کچه د سیلابونو له امله اغیزمن: ۱۱۰ زره. »
روغتیا نړېوال سازمان په راپور کې وړاندې راغلي،چې له کورونا وبا سربېره شری او د شدیدي نس ناستې چټکه خپریدا نورې هغه ناروغۍ وې،چې افغانان یې اغیزمن کړل.
یاد سازمان د واکسینو په مرسته د مخه نیونکو ناروغیو له ډلې د پولیو په اړه ویلي،چې تېر کال په ټول هېواد کې یوازې دوه مثبتې پېښې ثبت شوې وې.
د راپور یوه برخه:« د پولیو ضد ورکړل شوی واکسین: څه باندې ۹ میلیونه ډوزه
د شري ضد تطبیق شوی واکسین: ۸ اعشاریه ۱۶ میلیونه ډوزه
د کورونا ویا ضد تطبیق شوی واکسین: ۱۰ اعشاریه ۸ میلیونه ډوزه.»
د روغتیا برخه کې د ملګرو ملتونو دې ادارې تېر کال کې د خپلو خدماتو په اړه ویلي،څه باندې ۱۵۲ زرو بیړنیو ناروغانو او له ۳۲ زرو زیاتو غیر بېړنیو ناروغانو ته یې رسېدنه کړې ده.
د یاد سازمان د کلني راپور پر بنسټ، افغانستان کې یې نږدې ۹۵۸ ټنه روغتیایي توکي ویشلي او د ۴۸۹ روغتیاپالانو له روزنې سربېره یې د ناروغیو خپریدا سیمو ته د څار ۱۲۱روغتیايي ټیمونه هم استولي دي.
