د ناروې کډوالۍ شورا مشر یان اېګلنډ چې کابل ته په سفر راغلی دی او د اسلامي امارت له ځینو غړو سره یې لیدلي دي، وايي، ژمنه ورسره شوې،چې د ښځو کار بندیز پر لرې کېدو کار روان دی.
ایګلنډ ویلي،د اسلامي امارت مشرانو ورته ویلي، پر داسې یوه فرمان کار کوي،چې پرمټ به یې نجونو ته د زده کړو اجازه ورکړل شي او له ټولو مهمه دا ده،چې ښځې به بېرته خپلو کارونو ته ستنې شي.
اخوا د سیاسي چارو یو شمېر شنونکي هم بیا وايي، پر داسې طرحې کار روان دی،چې له مخې به یې د نجونو پر وړاندې د پوهنتونو او ښوونځيو دروازې خلاصې شي او په اداراتو کې به ورته د کار زمینه برابره شي.
د سیاسي چارو شنونکی هاتف مختار وايي:«د ابتدایي مالوماتو له مخې، اسلامي امارت په داسې یوه طرحه کار کوي،چې له مخې به یې د نجونو پر مخ پوهنتونونه او ښوونځی خلاص شي او هم به هغه ښځې چې غواړي، د ملګرو ملتونو ادارو کې کار وکړي بیا به شرایط ورته برابر شي.»
ځینې بیا وايي،غوښتنه یې داده،چې اسلامي امارت دې ژر تر ژه داسې یو فرمان وړاندې کړي،چې د شریعت مطابق نجونو ته د زده کړو اجازه ورکړل شي او ښځو ته د کار،چې له دې سره به د ولس او دولت ترمنځ شته واټن راکم او مرکزي نظام پیاوړی شي.
د سیاسي چارو فعال کمال ناصر اصولي وايي:« ښه به دا وي،چې د نجونو کار کولو او زده کړو لپاره داسې یو فرمان دې د حاکمانو له لوري صادر شي،چې د شریعت برابر نجونې کولی شي،چې زده کړې او کار وکړي، تر څو افغانستان له منزوي کیدو راووځي،که غواړي چې په افغانستان کې پیاوړی مرکزي دولت رامنځ ته کړي، د ولس او دولت ترمنځ دا واټن دې راکم کړي.»
د سیاسي چارو شنونکی مرتضی مطهري بیا وايي، کابل ته د ناروې کډوالۍ شورا مشر یان ایګلنډ سفر به مثبتې پایلې ولري او نږدې راتلونکي کې به ټولې هغه ستونزې حل شي چې دښځو د کار او انجونو د زده کړو په برخه کې پرتې دي .
مطهري زیاته کړې:« د ناروې کډوالۍ سازمان مشر لېدنې به په کابل کې د اسلامي امارت له مشرانو سره مثبتې پایلې ولري او په دې نږدې راتلونکې کې به د دې شاهدان اووسي، چې ښوونځي او دفترونه به د ښځو پر وړاندې خلاص شي.»
د ناروې دکډوالۍ شورا مشر اېګلنډ چې لاهم په کابل کې دی وايي، که اسلامي امارت پر ښځو د کار او د انجونو پر زده کړو لګېدلي بندیزونه لرې نه کړي، پر افغانستان به د نړیوالو مرستې ودریږي.
هغه زیاته کړې، که اسلامي امارت په دغه برخه کې مثبت ګامونه واخلي او دغه لګېدلي بندیزونه لرې کړي، نو دوی به په افغانستان کې خپل فعالیتونه بېرته پیل کړي.
