Skip to content
د بې پولې ډاکټرانو ټولنې له لوري په خپره شوې خبرپاڼه کې د اسلامي امارت له لورې په کورنیو او بهرنیو غير دولتي موسيسوکې د ښځو پر کار بنديز پریکړه خواشينونکې بلل شوې او ويلي دي چې د ښځينه کار کوونکو له فعالیتونو پرته د دوی کاري بهير له خنډ او ځنډ سر مخ کېدلی شي.
د خبرپاڼې یوه برخه:«زموږ له ۵۱ سلنو ډېر کارکوونکي ښځينه دي. موږ د هغو ۹۰۰ ډاکټرانو، نرسانو او نورو مسلکي کارکوونکو خبره کوو،چې هره ورځ پدې هڅه کې دي، تر څو زرګونه افغانانو ته ممکنه باکیفته روغتیایي خدمات وړاندې کړي. له دوی پرته د ایم.ایس.ایف فعالیتونه خنډ او ځنډ سره مخ کیږي. وروستي فرمانونه د هغو سیستماتیکو هڅو یو بل ګام دی،چې له مخې یې د ميرمنو حضور په عامه ټولنه کې له منځه وړل کېږي.»
د بې پولې ډاکټرانو په خبرپاڼه کې راغلي،چې افغانستان کې د دوی اړوند ښځینه ډاکټرانې او نرسانې د هېواد په اوو ولايتو کې د لومړنيو روغتيايي خدماتې ترڅنګ ډېری يې د ماشوم په زيږيدنه کې مرسته کوي او د دوی کاري بنديز به افغانې میرمنې او ماشومان سخت اغيزمن کړي.
د خبرپاڼې یوه برخه:«په هغه هېواد کې چې وګړي یې تر ډېره د پراخې بې وزلۍ او بې کارۍ له امله خیریه او بشري مرستو ته اړ دي، ښځینه کارکوونکې د هېواد په اقتصاد او د روغتیایي خدمتونو په وړاندې کولو کې رغنده او حیاتي رول لري. نوځکه د دوی له شتون پرته هېڅ لوی یا کوچنی بنسټ او موسسه نه شي کولی،چې اړمنې ټولنې ته مرستې ورسوي. وروستی فرمان به افغان اړمنې او زیانمنونکې کورنۍ په ځانګړي توګه ناروغه ميرمنې او ماشومان سخت اغیزمن کړي، له کار څخه د ښځو منع کول، په حقیقت کې د روغتیایي پاملرنو له لاسرسي څخه د دوی منع کول دي.»
په خبرپاڼه کې وړاندې ویل شوي،چې د دوی ښځينه کارکوونکو کاري فعاليت يې زياتره د ميرمنو د زيږون اړوند کيږي او نه شي کولی د دوی پر ځای نارينه کارکوونکي په دندو وګوماري.
خبرپاڼه کې خبرداری ورکړل شوی، که چيرې اسلامي امارت ښځو ته د کار کولو اجازه ورنه کړي،نو د دوی په شمول به ګڼ روغتيايي بنسټونه دې ته چمتو دي،چې په افغانستان کې خپل کاري بهير ودروي.
د خبرپاڼې یوه برخه:«که چیري زموږ ښځینه کارکوونکو ته د کار اجازه ورنه کړل شي او که د ښځو درملنه یوازې د میرمنو لخوا ترسره شي، نو بیا به د دوی لپاره روغتیایي خدماتو ته لاس رسی ناشونی وي. نو په پایله کې به د بې پولې ډاکټرانو په ګډون هېڅ روغتیایي بنسټ ونه توانيږي،ترڅو په افغانستان کې روغتیایی خدمات وړاندې کړي.»
بل خوا د سیاسي چارو شنونکي بیا وايي، په هېواد کې د بې پولې ډاکټءرانو او ورته نورو نړيوالو غیرې دولتې موسيسو تړل به بشري او اقتصادي ناورين رامنځته کړي او د مخنيوي لپاره يې اړتيا ده،چې اسلامي امارات د ښځينه وو په کار او زده کړو لګېدلي بنديزونه لرې کړي.
د بې پولې ډاکټرانو ټولنه د هېواد په اوو ولايتونو هلمند، کندز، هرات، خوست، کابل، کندهار او بامیانو کې روغتيايي خدمات وړاندي کوي.
د دې ټولنې د مالوماتو له مخې ،په افغانستان کې تر ۱۷۰۰ زيات روغتيايي کارکوونکي لري،چې له دغه شمير يې تر نمايي زيات ۵۱ سلنه يې ښځینه دي.
