د مرغومې شپږمه پر افغانستان د پخواني شوروي اتحاد د سرو لښکرو د یرغل له ۴۳مې کلیزې سره برابره ده، دا هغه ورځ ده،چې پوره ۴۳ کاله وړاندې د شوروي اتحاد سرو لښکرو پر افغانستان د ځمکې او هوا له لوري یرغل وکړ،چې په پایله کې یې پر میلیونونه افغانان کډوالۍ ته اړ شول،شااوخوا یونیم میلیون ووژل شول او کابو یو میلیون نور بیا معلول شوي دي .
د حزب اسلامي د دارالانشاء مشر عبدالستار خواصي وايي:« د مرغومې شپږمه د ۵۸ کال پر افغانستان د اتحادي جماهر شوروي د یرغل ورځ ده او دا د افغانان له ذهنه نه وځي. دا د تجاوز ورځ ده،د ظلم ورځ ده.»
د سیاسي چارو چارو شنونکي وايي، پر افغانستان د شوروي اتحاد یرغل د ټولو نړیوالو قوانینو او نورمونو خلاف یادیږي،چې پروړاندې یې افغان ولس د جهاد او سرښندنو په پایله کې دغه ښکیلاک ګرې سرې لښکرې ماتې شوې او د شوروي د جمهوریتونو اتحاد دړې وړې شو.
د سیاسي چارو شنونکی هاتف مختار وايي:« د مرغومې شپږمه پر افغانستان د روسانو یرغل د ټولو نړیوالو قوانینو خلاف وه. په افغانستان کې له ماتې سره مخامخ شول،خو یو نیم میلیون افغانان ووژل شول،اته میلیونه مهاجر شول،خو په پایله کې اتحاد جماهر شوروي هم په څو ټوټو وویشل شو، خو د مرغومې شپږمه هغه توره ورځ ده،چې افغانان به یې هېڅ کله هم هېره نه کړي.»
خو له هغې وروسته،چې جهاد بریالی شو او روسانو ماتې وخوړه،نو مجاهدین هم هغې موخه ته ونه رسیدل،چې د اسلامي نظام ټینګښت یادېده او لامل یې هم د هغه مهال سیاسي مشرانو ترمنځ اختلاف یادیدیږي.
د پوهنتون استاد محمد صادق مصعب وايي:« روسان له افغانستانه ووتل،خو مجاهدینو په خپلو کې جګړې وګړې او بلې مداخلې ته یې زمینه برابره کړه. افغانان داسې دي،چې حکومت وګټي بیا هغه ملت چې ورسره همکاري کړې، ورته نه متوجه کیږي او لا تر اوسه مو له تیرو تجربو درس نه دی اخېستی.»
