متحده عرب اماراتو،بریټانیا او اروپايي ټولنې په افغانستان کې د نجونو د زده کړو د ځنډولو او په کورنیو او بهرنیو غیر دولتي موسسو کې د ښځو د کار پر بندیز پرېکړو ته غبرګونونه ښودلي او د دغو پرېکړو د اخېستو غوښتنه یې کړې.
په کورنیو او بهرنیو غیر دولتي موسسو کې د ښځو د کار د بندیز په تړاو اروپایي ټولنې اندیښنه ښودلې او یاده پریکړه یې د اروپایي ټولنې په مرستو د منفي اغیز لامل ګنلی دی.
اروپایي ټولنې زیاته کړې:«موږ په انجوګانو کې د ښځو پر کار بندیز غندو او د دې پریکړې د بېرته اخېستو غوښتنه کوو. دا د طالبانو مسوولیت دی،چې نړیوالو بشري حقونو او اصولو ته ژمن پاتې شي. دا پریکړه به له افغانانو سره د اروپایي ټولنې پر مرستو بد اغیز پریږدي.»
خو په دې تړاو د اسلامي امارت ریاست الوزرا سیاسي مرستیال مولوي عبدالکبیر د خصوصي پوهنتونونو ټولنې د پلاوي سره په لېدنه کې یادونه وکړه،چې اسلامي امارت د زده کړو مخالف نه دی او هڅه دا ده،چې په یاده برخه کې ژر اقدامات وکړي.
هغه زیاته کړې:« افغانستان او اسلامي امارت د ټولو افغانانو شریک کور دی او هر افغان په کې د نظر او مشورې شریک کولو حق لري. اسلامي امارت د نجونو د زده کړو مخالف نه دی،خو هڅه کوي،رامنځته شوې ستونزه ژر حل کړي.»
د نجونو زده کړو بهیر ځنډولو او په کورنیو او بهرنیو غیر دولتي موسسو کې د ښځو پر کار بندیز پرېکړو اندېښنې پیدا کړي.
د سیاسي چارو یو شمېر کارپوهان وايي،که اسلامي امارت په دغو پرېکړو له سره غور ونه کړي،افغانستان به له یوه بل ستر اقتصادي او بشري ناورین سره مخ شي.
دا په داسې حال کې ده،چې د ډسمبر په ۲۲ مه نیټه د اسلامي امارت لوړو زده کړو وزارت په یوه مکتبوب کې تر امرثاني د ټولو نجونو لوړې زدهکړې تعطیل اعلان کړې .
له یادې پرېکړې دوه ورځې وروسته د ډسمبر په ۲۴ مه اقتصاد وزارت بیا د ټولو غیر دولتي ادارو او انجو ګانو څخه ښځینه کارکوونکې له کاره منع کړې،چې دواړو پریکړو په نړیواله کڅه غبرګونونه راپارول او یو شمیر نړیوالو موسسو په افغانستان کې خپل فعالیتونه درولي دي.
