ملګرو ملتونو د پکتیکا زلزله ځپلو لپاره ۷۰۰  بابه  نوي جوړ شوي کورونه رسما پرانېستل

د پکتیکا ولایت په برمل او ګیان او  د  خوست و لایت سپیرې ولسوالیو کې د شپږ میاشتې مخکې زلزله ځپلو لپاره د ملګرو ملتونو کډوالۍ سترې کمیشنرۍ له لوري ۷۰۰  نوي جوړ شوي کورونه پرون  رسما پرانېستل شول.

یاده کمېشنري په پام کې لري،چې د دې خلکو لپاره ټولټال ۱۳۰۰ کورونه جوړي کړي،چې پر پاتې ۶۰۰ یې برمل او سپیرې ولسوالیو کې کارونه روان دي.

د دغو کورنو د پرانیستې لپاره د یوناما مرستیال رامز الکبروف او افغانستان کې د قزاقستان سفیر هم ورغلي وو.

الکبروف وايي:« موږ دلته د برمل خلکو لپاره رغلو، تر څو په سخت وخت کې یې لاسینوی وکړو. دې خلکو سره عدالت نه و پلی شوی، روغتیايي خدمات یې نه درلودل، ښوونځي یې نه ول، کاري فرصتونه یې نه درلودل،خو اوس زموږ د کډوالو ادارې دا ټول چمتو کړي دي.» 

د دغو کورنو د جوړلو طرحه د ځایي اوسېدونکو سره له سلا مشورو وروسته عملي شوې،چې په کې دوه خونې، یو تشناب، یو پخلنځۍ او په بخاریو او لمریزې برښنا سمبال کورونه دي.

د دغو کورونو برخه کې د ملګرو ملتونو کډوالۍ ادارې سره د بریتانیا، امریکا او اروپایي ټولنې غړو هېوادونو په ګډون ټولو لسو هېوادونو مالي مرستې کړي دي.

افغانستنان کې د ملګرو ملتونو کډوالۍ ادارې استازی لیونارډ زولو وايي:« کله چې موږ دلته په لومړي ځل جون میاشت کې راغلو، هرڅه ړنګ ول. موږ د سیمې له اوسېدونکو مننه کوو،چې دومره زغم یې وکړ او اوس دا دی،سیمه کې ډېر پرمختګ راغلی دی. ټولې نړۍ د دې کلي درد احساس کړی دی او ژر تر ژره یې خپلې مرستې وکړې.» 

لیونارډ زولو ویلي، د پکتیکا برمل او ګیان ولسوالۍ اوس د کډوالۍ ادارې په هغه پرواګرام کې ملاتړ ورکړل شوی،چې د بېرته راستنیدونکو د ادغام او بېرته راګرځېدا لپاره سیمې په نښه کوي. 

دا اداره په پام کې لري،چې د دې ولسوالیو په کلیو کې سړکونه ورغوي، د څښاک اوبو لپاره څاه ګانې جوړې کړي، د سېلابونو اوبو زیرمې جوړې کړي او راتلونکي کال کې روغتیايي مرکزونه هم د دې ادارې په پلانونو کې دي.