Skip to content
د سیاسي چارو یو شمېر کارپوهان په دې اند دي،چې دافغانستان د اوسني نظام او نړۍ ترمنځ واټن د رالنډېدو په حال کې دی او افغانستان د خپل نړیوال حیثیت ترلاسه کولو پر لور ګامونه اخلي.
دوی وايي، د افغانستان لپاره د سیمې هېوادونو ته د امریکا ځانګړي استازي توماس وېسټ سفرونه ، افغان لوړپوړو چارواکو سره لېدنې او وروستۍ څرګندونې د دې ښکارندوي کوي،چې د کابل او واشنګټن ترمنځ اړیکې د ټینګښت په حال کې دي او دافغانستان اوسنی نظام نړیوالې رسمیت پیژندنې ته نږدې شوی دی .
د سیاسي چارو کارپوه سرور نیازی وايي:« د طالب چارواکو وروستي سفرونه او د امریکایانو ځينې څرګندونې او د توماس وېسټ سفرونه د دې ښکاروندوي کوي،چې د طالبانو او امریکا ترمنځ واټن نږدې شوی دی او بو بل ته شینه څراغونه ښي او اړیکې نږدې کیږي او د طالبانو د حکومت د رسمیت پيژندنې دروازې د خلاصېدو په حال کې دي.»
ځینې نور بیا وايي، د نړۍ امنیت اوس افغانستان پورې تړلی دی او نړیوال اړتیا لري،چې له اسلامي امارت سره د خبرو لاره هواره کړي او سیاسي تعامل غوره کړي.
دغه راز دوی په د ې باور دي،چې د افغانستان له اوسني نظام سره له تعامل پرته نړۍ بله لار نه لري.
د سیاسي چارو کارپوه هاتف مختار وايي:« نړۍ اړتیا لري،چې له افغانستان سره د خبرو اترو لاره خلاصه کړي، ځکه چې د نړۍ امنیت د افغانستان له امنیت سره نغښتی دی، له متحده عرب اماراتو د ملي دفاع وزارت سرپرست مولوي محمد یعقوب مجاهد لېدنه او بیا له توماس وېسټ سره لېدنې دا څرګندوي، چې نړۍ غواړي له افغانستان سره د تعامل لاره هواره کړي او له دې پرته بله هېڅ لاره نشته ده.»
خو پخواني چارواکي بیا وايي، د افغانستان د اوسنيو چارواکو، پخوانیو سیاسیونو او نړیوالې ټولنې د مهمو چارواکو سفرونه د افغانستان غوښتنه ده او اوسنی سیاسي حالت به ښه لوري ته لاړ شي.
په پارلماني چارو کې د جمهوریت مهال وزیر فاروق وردک وايي،اسلامي امارت مکلف دی،چې په خپلو خبرو او دریځونو کې د افغانستان عیني واقیعتونه په پام کې ونیسي اوعملي یې کړي.
هغه زیاتوي:« هغه که د افغانستان د اسلامي امارت ، سیاسي قشر لېدنې دي، که د افغان ولس غږونه چې اورو یې او که د بین المللي ټولنې د مسوولینو کتنې دي، دا د افغانستان د عیني واقیعتونو غوښتنه ده. په دې شک نشته ده،چې سیاسي حالات به ښه لور ته ځي. د بین المللي ټولنې له ځينو مهمو عناصرو سره د افغانستان د اسلامي امارت غیر مريي اما موجود تعامل اوس هم شته دی. اسلامي امارت مکلف دی،چې د افغانستان د ولس تقاضاء په نظر کې ونیسي، د افغانستان عیني واقیعتونه په نظر کې ونیسي اوهغه په خپلو خبرو او عمل کې یې منعکس کړي.»
له هغې وروسته،چې د ملي دفاع وزارت سرپرست مولوي محمد یعقوب مجاهد او پخواني ولسمشر حامد کرزي متحده عرب اماراتو ته سفرونه وکړل او هلته یې د دغه هېواد چارواکو ترڅنګ یې د افغانستان لپاره د امریکا له ځانګړي استازي توماس وېسټ سره یې لیدنې درلودې،افغانانو سره هیلې پيدا شوي،چې افغانستان به له نړیوالې سیاسي او اقتصادي انزوا ووځي.
