Skip to content
د ډیسمبر لسمه د بشري حقونو نړیواله ورځ ده،چې له افغانستانه په کې د عزت، آزادۍ او عدالت ټینګښت غوښتنه شوې ده.
په افغانستان کې د ملګرو ملتونو استازولۍ (یوناما) د بشري حقونو نړیوالې ادارې ورځې په مناسبت په یوه خبرپاڼه ویلي، افغانستان ۷۵ کاله مخکې د نړۍ یو له ۴۸ هېوادونو ول،چې د بشري حقونو نړیوال منشور ته یې رایه ورکړې او لاسلیک کړی یې دی.
یوناما په دغه خبرپاڼه کې له اسلامي امارته غوښتي دي، چې د منشور پر ژمنو دې عمل وکړي.
یوناما که څه هم افغانستان کې د بشري حقونو له وضعیت پوره راضي نه ښکاري،خو د اسلامی امارت له لوري د تېر حکومت چارواکو په ګډون ټولو ته عمومي عفوې اعلان او د ښځو حقونونو خوندیتابه برخه کې د فرمان صادرولو ستاینه کوي.
د خبرپاڼې یوه برخه:« د تېرحکومت چارواکو او پوځیانو ته عمومې عفوه، د ښځو حقونو او زندانیانو سره د چلند فرمانونه، د رسنیو آزادۍ څخه د سرغړنې د شکایتونو څیړلو ځانګړي کمیسیون تشکیل د افغانستان اوسنیو حاکمانو له لوري د بشري حقونو ساتنې برخه کې مثبت اقدامات دي.»
د تل په څېر، یوناما یو ځل بیا ویلي،چې د تېر کال له تحول راوروسته افغانستان کې د زده کړو او کار برخو کې د ښځو او نجونو حقونه په جدي توګه محدود شوي دي.
په خبرپاڼه کې وړاندې ویل شوي،چې پر ښځو او انجونو لګیدلي محدودیتونه دغه قشر لا کمزوری کوي.
د خبرپاڼې یوه برخه:« یوناما په افغانستان کې د چارواکو له خوا د صحرایي محکمو، شکنجو او ناسم چلن او زنداني کولو قضیې هم مستند کړي دي.موږ له اوسنیو حاکمانو غواړو،چې په دې برخو کې بې پرې او رڼې څیړنې وکړي او عاملین عدالت ته راکاږي.»
افغانستان کې د ملګرو ملتونو استازولي (یوناما)داسې مهال د افغانانو پر بشري وضعیت اندېښنه ښیي،چې اسلامي امارت په کراتو دغو حقونو ته خپله ژمنتیا ښودلې او ویلي یې دي، چې ټول افغانان د شریعت په رڼا کې له خپلو حقونو برخمن دي.
