ټاکل شوې ده،چې توماس ویټ له هند وروسته متحده عرب اماراتو ته هم سفر ولري .
د سیاسي چارو یو شمېر تحلیل کوونکي بیا وايي، متحده عرب اماراتو ته د ملي دفاع وزارت سرپرست ملا محمد یعقوب مجاهد سفر او په دغه هېواد کې د پخواني ولسمشر حامد کرزي پاتې کیدل او بیا ورته د امریکا ځانګړي استازي توماس ویسټ سفر چې ښايي ژر ترسره شي، د افغانستان په ګټه دي.
دوی وايي، نړۍ اوس ډاډه ده،چې د افغانستان له خاورې سیمې او نړۍ ته نور ګواښ نه پیښیږي او یو ځل بیا یې افغانستان د خپلو بحثونو محراق ته راوستی دی.
د سیاسي چارو تحلیل کوونکی مختار هاتف وايي:« افغانستان یو ځل بیا د سیمې او نړۍ د خبرو اترو پر محراق کې قرار لري،د مولوي محمد یعقوب مجاهد سفر هم متحده عرب اماراتو ته،چې دا د افغانستان ته ګټور دی. له بل اړخه متحده عرب اماراتو ته د توماس ویسټ سفر او د پخواني ولسمشر حامدکرزي سفر هم ګټور تمامیدی شي. اوس نړۍ په دې باوري ده، چې افغانستان له دې وروسته ګاونډيو او د سیمې لپاره ګواښ نه دی.»
سره له دې چې د ملي دفاع وزارت ویلي، سرپرست وزیر په رسمي سفر متحده عرب اماراتو ته تللی او هلته به له افغانانو سربېره د کوربه هېواد له چارواکو سره وګوري.
خو تحلیل کوونکي تمه لري، چې چې توماس ویسټ به متحده عرب اماراتو ته سفر کې ښايي له ملي دفاع وزارت سرپرست سره هم وګوري او د سیمې هېوادونو سره پر ګډه له اوسني وضعیت د افغانستان وتلو پرحل لارې پیداکولو کار وکړي.
د پوهنتون استاد فیض محمد ځلاند وايي:« د اسلامي امارت په استازولۍ د ملي دفاع سرپرست وزیر په متحده عرب امارتو کې حضور لري. تمه کیږي،چې هغوی به هم د امریکا له ځانګړي استازي او د هغوی له پلاوي سره ناستې ولري او په دې برخه کې به د افغانستان ستونزې د حل او د سیمې هېوادونو سره پر ګډه د اسلامي امارت له مشرانو سره خبرې وکړي او دې ستونزې ته د حل لار پیدا کړي.»
د سیاسي چارو تحلیل کوونکی حکمت الله حکمت بیا وايي، له اوسني اقتصادي او سیاسي حالته د وتلو یوازینۍ لاره د افغانانو ترمنځ د خبرو پیل دی او د افغانستان اوسنی سیاسي مشرتابه او ټول افغانان باید د ډیالوګ پروسه ځواکمنه کړي.
حکمت زیاتوي:«له اوسني ستونزمن اقتصادي او سیاسي حالته د وتلو یوازینۍ لاره د افغانانو ترمنځ د خبرو پيل ده، هغه وروستي خوځښتونه،چې په دې تړاو پیل شوي، د ستایلو وړ دي او د دې پرمختګ باید د سیمې او نړیوالې ټولنې په همکارۍ سره موږ باید ووینو. په لومړي سر کې د اسلامي امارت سیاسي مشرتابه او ټولو افغانانو مسوولیت دی،چې د ډيالوګ پروسه ځواکمنه کړي.»
د افغانستان لپاره د امریکا ځانګړی استازی توماس ویسټ دمګړۍ په هند کې دی او ټاکل شوې ده، چې متحده عرب اماراتو ته او بیا سعودي عربستان او اسلام اباد ته سفرونه ولري، چې په دې تړاو به د سیمې له دغو هېوادونو سره د افغانستان په تړاو خبرې وکړي.
