کابل ته د اسلامي هېوادونو همکاریو سازمان سفیر سعید ال عیاش وايي:« کابل کې مو نن رسما د اسلامي هېوادونو همکاریو سازمان دفتر پرانېست. د سعودي عربستان له حکومته مننه،چې افغانستان کې یې د دغه سازمان د فعالیتونو پراخه کولو او غښتلي کولو لپاره همکاري وکړه. دغه دفتر به له افغانانو سره مرستې وکړي،چې په اوس کې له بشري، ټولنیزو، اقتصادي او سیاسي ستونزو سره مخ دي.»
د بهرنیو چارو وزارت سرپرست مولوي امیر خان متقي بیا له دغه اقدام هرکلی کوي او دا یې د ځان لپاره سیاسي او ډیپلوماټیکه بریا وبلله.
متقي زیاتوي:« د دې دفتر پرانېسته واقعا یوه بریا ده، یوه سیاسي بریا ده، یوه ډیپلوماتیکه بریا ده او یو پرمختګ دی. موږ هېله لرو،چې د همدې دفتر پرانېستو او فعالیت په پایله کې به افغانستان کې ډېرو اړمنو کسانو ته هم بشري مرستې ورسېږي او هم به د اسلامي هېوادونو مرستې له همدې لارې لا ښې تنظیم شي.»
متقي که څه هم د دغه دفتر په مرسته د اسلامي هېوادونو د بشري مرستو د ښه تنظیم خبره کوي، خو غوښتنه لري چې دغه فعالیتونه دې پر بشري مرستو نه محدودیږي.
اخوا په ناسته کې د افغانستان لپاره د اسلامي هېوادونو همکاریو سازمان ځانګړي استازي طارق علي بخیت،چې د همدې سازمان عمومي مشرپیغام یې ولوسته وویل، له اسلامي پراختیایي بانک سره په همغږۍ یې داسې صندوق پرانېستی دی،چې په مرسته به یې له افغانستان سره بشري مرستې تنظیم کېږي.
بخیت وايي،چمتو دي،چې د همدې دفتر له لارې له افغانستان سره په ټولو برخو کې همکاري وکړي.
هغه زیاته کړه:« د دغه دفتر پرانېسته به افغانستان کې د بشري مرستو ویش او پرمختګ کې ونډه ولري. دغه دفتر به افغانستان کې د بشري، ښوونیز، ټولنیز، اقتصادي او سیاسي سکتورنو د همغږي کولو او پیاوړي کولو لپاره د یوه چینل حیثیت ولري،تر څو په افغانستان کې سوله، امنیت او ثبات یقیني شي.»
علي بخیت وايي، افغانستان کې د نجونو ښوونځیو پرانېستل او د ټولشموله حکومت تشکیل د نړیوالې ټولنې او اسلامي هېوادونو غوښتنه ده او په همدې تړاو یې له اسلامي امارت سره خپل بحثونه جاري ساتلي دي.
دغه راز هغه وايي، په افغانستان کې بشري وضعیت ورځ بلې ته خرابیږي او د دې وضعیت له امله تر ټولو ډېر زیانمن شوی قشر ماشومان او ښځې دي.
