Skip to content
څمکنۍ د لویې پکتیا او د هېواد پر کچه د وریجو په حاصلاتو کې مشهوره ولسوالي ده،خو سږ کال په کې د وچکالۍ له کبله پر ډېره کمه ځمکې کرل شوې وې.
ځايي بزګران وايي، لومړی وچکالۍ او وروسته د پرلپسې ورښتونو له کبله ونه توانیدل،چې په ډېره ځمکه شولې وکري.
د څمکنیو ولسوالۍ د وریجو یو تن بزګر وايي:« سږ کال لومړی وچکالي وه او له وچکالۍ بیا وروسته ورښتونه وشول. حاصلات مو د نورو کلونو پر تله ډېر کم دي.»
د څمکنیو ولسوالۍ د وریجو یو بل بزګر بیا وايي:« زموږ په سیمه کې سږ کال حاصلات بیخي کم دي. لومړیو کې وچکالي وه او بیا وروسته ورښتونو له امله سېلابونه راغلل او کرنیزې ځمکې یې خرابې کړې.»
د وچکالۍ له امله سږ کال د څمکنیو ډېری سیمو کې لوبیا او مۍ کرل شوي او برګران یې له حاصلاتو ناراضه دي .
په څمکنیو ولسوالۍ کې یو تن بزګر وايي:« د پکتیا پر کچه څمکنیو ولسوالۍ کې وریجې ښه حاصل ورکوي. دا ولسوالۍ داسې وریجې لري، چې په ټوله پکتیا کې نوم لري. سږ کال د وچکالۍ له امله چا چې شولې کرلې وې، هغه خرابې شوې. دغه راز خلکو لوبیا او مۍ هم کرلې وې.»
خلک د کرنې او مالدارۍ ریاست او مرستندویه بنسټونو غواړي،چې د اصلاح شویو تخمونو او کیمیاوي سرې مرسته دې ورسره وکړي،چې راتلونکی کال یې حاصلات ښه شي.
څمکنیو ولسوالۍ یو تن اوسېدونکی وايي:« له اسلامي امارته مو غوښتنه دا ده،چې بزګرانو د اصلاح شوي تخمونه او کیمیاوي سره پر خپل وخت ورکړي.»
اخوا د یاد ولایت د کرنې او مالدارۍ ریاست د کرنیزو چارو امر مومند خروټی بیا وايي، سږ کال څمکنیو ولسوالۍ کې د وریجو حاصلات ۸۵۷ مټیریک ټنه اټکل شوي او تیر کال شااوخوا ۱۱۰۰ ټنه وو.
