په افغانستان کې دامریکا د ۲۰ کلن حضور پرمهال ۶۶ زرو د هغه مهال افغان ځواکونه ووژل شول،له ۱۰۰ زرو زیات ټپیان شول او همدا راز ۴۷ زره ملکیان ووژل شول او له ۷۵ زرو زیات ټپیان شوي دي.
د مخکیني حکومت د امنیتي ځواکونو ویاند جنرال اجمل عمر شینواری وايي:« بد بختانه،چې موږ په دې شل کلنه جګړه کې،چې د نړیوالو وه او قرباني یې افغانان ول، په دغه جګړه کې موږ ۶۶ زره پوځیان شهیدان درلودل، په ملکي برخه کې موږ ۴۷ زره شهیدان درلودل او له ۱۰۰ زرو ډېر پوځیان ټپیان شوي دي او ۷۵ زره ملکیان ټپیان شوي دي.»
کارپوهان وايي، امریکا په خپل شل کلن پوځي ماموریت کې،چې په افغانستان کې یې درلود، د نړیوالو قوانینو خلاف یې بشري جنایتونه ترسره کړي ،د طالب او اردو په نوم یې افغانان په خپلو کې جنګولي او همداراز په زرګونه نور یې د ترهګرۍ په تور زندانونو ته واچول.
د سیاسي چارو کارپوه هاتف مختار وايي:« د امریکا متحده ایالتو د یوې غلطې ستراتیژۍ په پایله کې پر افغانستان یرغل وکړ،چې په پایله کې یې په زرګونه افغانان ووژل شول،کورونه یې وران شول،جوماتونه یې شهیدان شول،مشران یې زندان ته وغورځول شول،د ټولو نړیوالو قوانینو پر خلاف یې دلته بشري جنایتونه وکړل،افغانستان یې په قومونو ووېشه،د قدرت جزایر یې رامنځ ته کړل اردو یې له طالب او طالب یې له اردو سره وجنګول.»
ځینې نور بیا وايي، امریکا د هغه شعار برعکس،چې ترهګرۍ به له منځه وړي عمل وکړ، ۲۱ کاله وړاندې یې هم په افغانستان کې له ترهګرۍ اندیښنه درلوده او اوس په افغانستان کې له ۲۰ کلنې جګړې له ماتې وروسته هم د ترهګرۍ له ودې اندیښنه لري.
د سیاسي چارو فعاله ډیوه پتنګ وايي:« امریکا دلته د ترهګرو له منځه وړلو په پلمه راغله،خو نن هم په همدې جګړه کې ښکیله ده او د ترهګرو نوم اخلي. وې نه شوی کړی،چې په سیمه کې ترهګر له منځه یوسي او افغانستان ته یې هم ګټه ونه رسیده. په داسې حال کې چې په هیڅ کوم ترهګریز برید افغانان ښکیل نه ول،خو د دغې استخباراتي جګړې قربانیان افغانان ول او تر ننه پورې قرباني افغانان ورکوي.»
شل کاله امریکا په افغانستان کې د افغان ولس له کلک مقاومت او مبارزې سره مخه شوه او بلاخره د ۲۰۲۱ کال د اګست میاشتې پ ۳۱ نیټه یې ټول ځواکونه له افغانستان ووتل او جنرال کریس ډون هاوي د امریکايي ځواکونو وروستی سرتیری وه،چې د افغانستان خاوره یې پریښوده او امریکايي الوتکې ته پورته شو.
