امریکا او پاکستان د افغانستان په اړه خبرې کړي 

د امریکا بهرنیو چارو وزارت انټوني بلېنکن له خپل پاکستاني سیال بلاول بوټو زرداري سره لیدلي دي.

د امریکا بهرنیو چارو وزارت له لوري په خپره شوې خبرپاڼه کې ویل شوي،چې دواړو لورو په دغه لېدنه کې د خوړو خوندیتوب، اقتصادي او د سیمې له ټيکاو سربیره د افغانستان پر قضیه هم خبرې کړي دي.

د سیاسي چارو تحلیل کوونکي وايي، له نړیوالو سره د افغانستان په تړاو د پاکستاني چارواکو خبرې او لیدنې د دې مانا لري،چې دغه هېواد د ټولو نړیوالو اصولو خلاف نړیوالو ته ځان د افغانستان استازی ورپیژني او د افغانانو په استازولۍ  ورسره لېدنې کوي.

دوی وايي، امریکا د افغانستان قضیه د پاکستان له لارې مخ ته وړي او د دې په بدل کې پاکستان ته پیسې ورکوي .

د سیاسي چارو تحلیل کوونکی  توریالی ځاځی وايي:« دا چې بلاول بوټو د افغانستان په استازولۍ له بلېنکن او په نورو ځایونو کې د نړۍ له مشرانو سره خبرې کوي، دلیل یې دادی، چې امریکا د افغانستان قضیه پاکستان ته سپارلې او د دغه هېواد له لارې یې مخکې وړي،بله داچې پاکستان دوه سریزه  لوبه کوي،له یو لوري وايي چې د افغانستان ستونزه باید حل شي او له بل لوري بیا وايي افغانستان د ترهګرۍ ځاله ده، داهم دامریکا په اشاره ترسره کوي او په بدل کې یې پاکستان پیسې اخلي.»

د سیاسي چارو تحلیل کوونکی سید بلال فاطمي بیا وايي، د پاکستاني چارواکو وروستیو څرګندونو ته چې د افغانستان په تړاو یې پهخ نړیوال سټیج کې کړي دي،باید جدي ځواب ورکړل شي چې اسلام باد نور له دغه ډول کړنو لاس واخلي.

فاطمي زیاتوي:«زما وړاندیز بهرنیو چارو وزارت ته دادی،چې پاکستان ته باید جدي ځواب ورکړي،چې نور ونه شي کولی،چې د افغانستان په کورنیو چارو کې مداخله وکړي او بهر کې استازیتوب وکړي. دا مسوولیت د طالبانو د حکومت دی نه د ولس.»

دا لومړی ځل نه دی،چې پاکستاني چارواکي له نړیوالو سره د افغانستان په تړاو خبرې کوي، بلکې له دې وړاندې هم د دغه هېواد مخکیني لومړي وزیر عمران خان، بهرنیو چارو وزارت مخکیني وزیر شاه محمود قریشي څو ځله د افغانستان په تړاو له نړۍ سره خبرې کړي او په نړیوالو کنفرانسونو کې یې یو ډول ځان د افغانستان استازی بللی دی،چې د پاکستاني لوري دغه داقدام پر کوردننه له سختو نیوکو او غبرګونونو سره مخ شوی دی.