Skip to content
د پکتیکا ولایت کډوالو چارو ریاست مشر عبدالرحمن هاشمي وایي، لا هم د دغه ولایت په ګیان،برمل او زیړوک ولسوالیو کې زلزله ځپلي خلک سرپنا او خوراکي توکو ته بېړنۍ اړتیا لري.
هاشمي وايي،د ژمي په رانږدې کیدو سره ګیان، برمل او زیړوک ولسوالیو کې د بې ځایه شویو کورنیو ستونزې لا پسې ډېریږي او بېړنیو مرستو ته اړتیا پیداکوي.
هغه زیاته کړه:« د زلزله ځپلو ډېری سیمو خلک سرپنا نه لري. دا خلک سرپنا ته ډېره اړتیا لري. دغه راز له سرپنا سربېره دوی خوراکي توکو ډېره اړتیا لري،چې باید دې خلکو(زلزله ځپلو) ته ورکړل شي،ځکه بغیر له خوراکي توکو نه کېږي.»
په ورته وخت کې د ملګرو ملتونو د کډوالو عالي کمېشنري (یو.این.ایچ.سي.ار) په پکتیکا کې له شااوخوا هغو ۲۰۰ کورنیو سره د ۷۰۰ ډالرو نقدي مرسته وکړه،چې د جګړو له کبله بې ځایه او په خپله خوښه خپلو مېنو ته ستنې شوې دي.
د وېسټا موسیسې استازی مطیع الله وايي:« له هرې کورنۍ سره د ۷۰۰ امریکايي ډالرو د (یو.این.ایچ.سي.ار) په مالي ملاتړ مرسته کېږي. دا هغه کورنۍ دي،چې پخوا د جګړو له امله ښرنې ته بې ځایه شوي ول. د اسلامي امارت په راتګ سره دوی بېرته خپلو سېمو ته راستانه شول.»
خپلو مېنو ته ستنې شوې کورنۍ وایي، جګړو او سېلابونو یې کورونه ویجاړ کړي او له بد اقتصادي حالت سره مخامخ دي.
دوی وایي، دغه نقدي مرسته یې ستونزې نه شي هوارولی او راتلونکي کې یې هم باید لاسنیوی وشي.
د پکتیکا کډوالو چارو ریاست د مالوماتو له مخې، لا هم په دغه ولایت کې شااوخوا څلور زره داسې کورنۍ شته دي، چې د جګړو له کبله بې ځایه شوي او تر اوسه پورې خپلو مېنو ته نه دې ستنې شوي.
