د نجونو پر مخ ښوونځي پرانیزئ او زده کړو ته یې پرېږدئ، هغه شعار چې کال کېږي، پر کوردننه او بهر بدرګه کیږي،خو لا هم اسلامي امارت نه دی توانېدلی،چې له شپږم ټولګي پورته د نجونو پر مخ ښوونځي پرانیزي.
د خواله رسنیو کارونکو او یو شمېر پخوانیو او اوسنیو سیاسیونو په پکتیا ولایت کې د نجونو پرمخ له شپږم ټولګي پورته د ښوونځيو دروازو بېرته تړل کېدو پرېکړه ننګولې او له اسلامي امارته یې غوښتي،چې ښوونځي پرانیزي.
د سیاسي چارو شنونکي عزیز معارج پر خپله ټویټرپاڼه لیکلي:« سراج الدین حقاني، مولوی یعقوب، فاروق اعظم، ذبیح الله مجاهد او عباس ستانکزی وايي، چې ښوونځي دې پرانېستل شي، اوس پوښتنه دا ده،چې پرېکړه د چا په لاس کې ده؟»
د المپيک ملي کمېټې مشر نظر محمد مطمئین بیا پر خپله ټویټرپاڼه لیکلي:« یو مخ نه بندېږي او نه یو مخ خلاصېږي،تر کومه به دا حال وي؟ د نجونو ژړا، د کورنیو او بهرنیو رسینو سرټکي، له هېواده د خلکو وتل، د ښوونځیو د نجونو لاریون او هوايي ډزې، دا مسله اساسي او سم حل غواړي.»
پخوانیو افغان چارواکو هم د افغانو نجونو پر وړاندې د زده کړو محدودیتونو د لرې کولو غوښتنه کړې.
پخواني ولسمشر حامد کرزي پر خپله ټویټرپاڼه لیکلي:« د پکتیاوالو نجونو غږ د ښوونځیو د پرانېستلو لپاره د ټولو نجونو او افغان ملت غږ دی. له سرپرست حکومته غواړم،چې د نجونو پر مخ دروازې پرانیزئ.»
د بهرنیو چارو وزارت پخواني وزیر حنیف اتمر بیا لیکلي:« له دې انساني او اسلامي حقه د هېواد نجونو بې برخې کول ستره تېروتنه ده.»
د سیاسي چارو فعاله زرغونه ولي بیا وايي، ښځو ته کاري فرصتونه نه برابرول او د نجونو پر وړاندې د زده کړو محدودیتونو دوام به اسلامي امارت نړۍ سره لا هم په تقابل کې واقع کړي او د ولس او حکومت ترمنځ به واټن زیات شي.
