د دغې ناستې له اجنډا با خبره څېرې وايي، غونډه کې به د پخواني جهادي قوماندان احمد شاه مسعود زوی احمد مسعود، شکریه بارکزۍ، زلمی رسول ، دادفر سپنتا ، سید سادات نادري او فوزیه کوفي هم ګډون وکړي. د سیاسي چارو تحلیل کوونکي وايي، دغه کسان په افغانستان کې هېڅ ډول ځواک او ولسي بیز نه لري او نه یې هم ناستې د افغانستان پر وضعیت اغیزمنې دي.
مالومات دادي،چې ددغې ناستې مالي لګښت د فرانسې له لوري ورکول کیږي او ډېر رول هم په کې د پخوانۍ نظار شورا غړي او د احمد شاه مسعود زوی،چې دفرانسې له نږدې کسانو یادیږي، لري.
د سیاسي چارو تحلیل کوونکی عزیز معارج وايي:« لومړی داچې د دې غونډې اجنډا نه ده مالومه او بودیجه یې هم د فرانسې د یهودانو له لوري ورکول کیږي او ناسته هم د پخوانۍ نظار شورا له لوري جوړه شوې.»
اخوا د سیاسي چارو تحلیل کوونکی زلمی نصرت بیا وايي، دغه ناسته د افغانستان په اوسني وضعیت هېڅ ډول اغیز نه لري او نه هم اسلامي امارت له دغو کسانو چې د سپټمبر په ۱۵ مه په ویانا کې سره راټولیږي،کومه وېره او ډار لري.
نصرت زیاتوي:« د دوی ناستې د افغانستان په اوسني وضعیت هېڅ ډول اغیز نه لري او نه هم طالبان له دوی ډاریږي،دا ځکه چې دوی له طالبانو تښتیدلي دي او دوی ته خپل زور او د طالبانو زور مالوم دی.»
