Skip to content
د کابل ښار دارالامان سیمه کې د دوشنبې پر ورځ د « ۱۴۰۱ کال د وږي پر ۱۴ مه» غرمه مهال یوه ځانمرګي بریدګر د روسیې سفارت دروازه کې افغان مراجعین پر نښه کړي.
د کابل امنیه قوماندانۍ ویاند خالد ځدراڼ وايي،امنیتي ځواکونو یاد بریدګر موخې ته له رسیدو وړاندې پر نښه کړ.
هغه زیاته کړې:« کابل کې د روسیې سفارت سره د چاودنې له امله زموږ ۴ هېودوال،همداشان دوه تنه د روسیې سفارت کارمندان وژل شوي او د دې تر څنګ یو شمیر افغانان ټپيان شوي دي. ځانمرګی بریدګر وار لمخه د امنیتي ځواکونو لخوا پر نښه شوی وه، او له امله یې چاودنه رامنځته شوي ده. پېښه د کشفي او امنیتي ارګانونو تر څار لاندې ده.»
د روسيې سفارت هم منلې ده،چې دغه پېښه د سفارت دروازې ته څېرمه شوې او د دوه ډيپلوماتانو په ګډون ګڼ افغانان په کې وژل شوي دي.
د روسیې بهرنیو چارو وزارت:« یو نامالوم کس د روسیې سفارت کونسلي چارو برخې ته نږدې چاودیدونکو توکو ته چاودنه ورکړې،چې په پایله کې یې د ډیپلوماتیک ماموریت دوه کارکوونکي وژل شوي دي. په چاودنه کې ګڼ افغانان هم وژل شوي دي.»
د افغانستان اسلامي امارت ویاند ذبیح لله مجاهد د دغې پيښې په تړاو د پلټنو خبر ورکړی دی.
هغه زیاته کړې:«نن غرمه یوولس بجې د کابل ښار په اومه حوزه کې هغه مهال چاودنه رامنځته شوې،چې یو کس غوښتل،له ځانه سره چاودیدونکي توکي انتقال کړي. چاودنه کې یو شمېر هېوادوالو ته مرګ ژوبله اوښتې. د همدې پېښې د لا وضاحت په اړه څېړنې پيل شوي دي.»
د افغانستان د بهرنیو چارو وزارت هم دغه پيښه غندلې او ډاډ یې ښودلی دی،چې په کابل کې د ټولو سفارتونو او بهرنیو سیاسي نماینده ګیو امنیت تامین دی.
د یاد وزارت ویاند عبدالقهار بلخي وايي:«نن له غرمې مخکې په کابل کې د روسیې سفارت د کونسلي څانګې دروازې ته څېرمه چاودنه وشوه،چې له امله یې د روسيې سفارت دوه تنه کارماندانو په کې خپل ژوند له لاسه ورکړی او څو تنه مراجعین ټپیان شول.
د ا. ا. ا. د بهرنیو چارو وزارت دا پېښه پر کلکو ټکو غندي او د روسیې حکومت، ولس او د قربانیانو کورنیو ته خپل د غمشریکۍ او خواخوږۍ مراتب وړاندې کوي.
زموږ امنیتي ارګانونو د پښې په تړاو هر اړخیزه څېړنه پیل کړې او د سفارت د لاخوندیتوب لپاره به لا زیات جدي ګامونه هم پورته کړي،ترڅو دغه ډول احتمالي ګواښونه د سفارتونو کار له خنډ سره مخ نه کړي. د ا.ا.ا د روسیې فدراتیف سره نژدې اړیکې لري او موږ اجازه نه ورکوو،چې د دښمنانو دغه ډول منفي کړنې د دواړو هېوادونو پر اړیکو منفي اغېز وکړي.»
امنیه قومنداني پيښه کې ددوه روسي اتباعو په ګډون د څلور افغانانو وژل کیدل تائیدوي،خو عیني شاهدان بیا وايي،دپيښې ځای کې لسګونه مراجعین راټول شوي وو او له شلو زیات کسان مړه او ټپيان شوي دي.
د برید مسوولیت د اسلامي دولت نومې ډلې یا داعش پر غاړه منلی دی.
