منیر: ټولنیز حساسیتونه او کلتوري مسایل د نجونو ښوونځيو تړلو لامل شوي

د افغانستان اسلامي امارت د پوهنې وزارت سرپرست نورالله منیر خوست ولایت ته د خپل سفر پر مهال خبریالانو ته وویل، ټولنیز حساسیتونه او کلتوري محدویتونه هغه لویې ننګونې دي،چې له کبله یې له شپږم ټولګي پورته ښوونځي تر اوسه پورې تړلي پاتې دي.

منیر وايي،په  لرې پرتو سیمو کې لا هم ډېری کورنۍ شته  دي،چې د نجونو له تعلیم سره مخالفت لري او په خبره یې هڅه کوي،چې خلکو ته د دې ستونزې د حل لپاره عامه پوهاوی ورکړي.

هغه زیاته کړه:«د افغانستان اسلامي امارت د نجونو له تعلیم سره کوم مخالفت نه لري او نه په هغې باندې کومه شرعي ملاحضه لري،خو اصل کې د افغانستان په لرې پرتو سیمو کې خلک د نجونو له تعلیم سره نه بلکې له خپله کوره د نجونو له وتلو سره حساسیت لري، نو د افغانستان اسلامي امارت کوښښ کوي،چې له خپل ټول ولس سره په دې اړه يو قناعت حاصل کړي او ښوونځي پرانیزي.»

له شپږم ټولګي پورته د نجونو د زده کړو په اړه د اسلامي امارت د ویاند مرستیال بلال کریمي بیا پرهغې پرېکړې ټينګار کوي،چې په کې د نجونو د ښوونځیو بیا پيل کې د امر ثاني خبره شوې ده.

کریمي زیاته کړه:«په دې اړه د اسلامي امارت پوهنې وزارت له لورې په هماغه لومړیو کې یوه خبرپاڼه نشر شوې وه،چې هلته وضاحت ورکړل شوی وه.»

که څه هم د پوهنې سرپرست وزیر د ښوونځيو د پيل په اړه د ژر شروع کېدو خبره کړې،خو لا مالومه نه ده،چې دغه پرېکړه به څومره ژر عملي او د هغو غوښتنو ځواب شي،چې پر کور دننه او بهر يې غوښتنه کیږي.

نږدې کال پوره کیږي،چې لا هم له شپږم ټولګي پورته د نجونو پر مخ د ښوونځیو دروازې تړلې پاتي او په دې موده کې ولس ته د ښوونځيو د تړلو په اړه قانع ورکوونکی ځواب یا وضاحت نه‌ دی ورکړل شوی.