د روغتیا نړیوال سازمان افغانستنان کې له زلزله ځپلو سیمو او خلکو سره له مرستو نیولې بیا د روغتیاپالانو تر روزنې او د بېلابېلو ساري ناروغیو مخنیوي او واکسین برخو کې فعاله ونډه لري،چې پر دوام یې تازه د تیرې جولای میاشتې راپور خپور کړی دی.
راپور کې ویل شوي،د نورو مرستو سربېره یې یوازې ۴ اعشاریه ۷ میلیونه ډالر له زلزله ځپلو سره د مرستو لپاره ځانګړي کړي، چې په کې د اسهالاتو مخنیوي او درملنې مرکزونو جوړول هم شامل دي.
د راپور یوه برخه:«۲۳۰۵۹۸ خلکو ته روغتیایي خدمات رسیدلي، ۷۱ ټنه روغتیایي او غیر روغتیایي توکي ویشل شوي، ۳۲۱ روغتیاپالان روزل شوي، د ساري ناروغیو خپریدو سیمو ته ۱۰۲ ټیمونه استول شوي او ۳۶۹۶ ناروغانو ته د فزیکي بیا رغیدنې خدمات رسیدلي دي.»
روغتیا نړېوال سازمان په دې راپور کې د ژمي لپاره هم خپل پلان وړاندې کړی او ویلي یې دي،چې د ۱۰ اعشاریه ۴ میلیونه خلکو لپاره یې د ژمي چمتووالي نیولي دي.
د ژمي لپاره یو اعشاریه یو میلیون کسان په لومړیتوب کې نیول شوي،چې ټولټال ورته ۱۸ میلیونه ډالر ځانګړي شوي دي.
له زلزله ځپلو او سیلاب ځپلو سره د مرستو وراخوا روغتیا نړیوال سازمان د ساري ناروغیو په برخه کې لاندې خدمات ترسره کړي دي.
د راپور یوه برخه:« تېره میاشت په ټول افغانستان کې د کوروناوبا ۱۸۵۷۷۵ مثبتې پېښې، ۱۹۰۵۰ د اسهالاتو پېښې، ۶۴ د ډینګي تبې پېښې، ۶۳۶۵۴ د شري پېښې او ۲۲۹ د کانګو ورته ناورغی پېښې ثبت شوي دي.»
د روغتیا نړېوال سازمان شمېرې ښیي،چې تېره میاشت د هېواد پر کچه دوه اعشاریه یو میلیون کسانو د کورونا وبا ضد واکسین لګیدلی دی.
یاد سازمان همداراز د کورونا وبا مخنیوي لپاره له روغتیا وزارت سره پر همغږی د شپږ روغتیایي مرکزونو تمویل ترسره کوي.
