په کابل کې د ایمنالظواهري د وژلو له ادعا پوره یوه اوونۍ پوره شوه او د افغانستان اسلاميامارت د امریکامتحده ایالتو ولسمشرجو بایډن ادعا ته، په غبرګون کې یوازې پر کابل ډرون برید غندلی،خو په کابل کې یې د الظواهري د اوسیدو او یا دالقاعده شبکې د نورو غړو د حضور په اړه بې خبري ښودلې ده.
د افغانستان اسلامي امارت ویاند ذبیح الله مجاهد رسنیو ته ویلي، په کابل کې د امریکا متحده ایالتو بې پیلوټې الوتکې وروستي برید کې له داسې موادو کار اخېستل شوی وه،چې هرڅه یې له منځه وړي دي او د برید پرځای کې ان د چا جسد هم نه دی موندل شوی.
مجاهد زیاته کړې،چې د موضوع د ټولو اړخونو په تړاو یې څېړنې لا روانې دي .
مجاهد زیاته کړه:« په دې برید کې له داسې موادو کاراخېستل شوی دی،چې هرڅه یې له منځه وړي او ان د برید په ځای کې د چا جسد هم نه دی موندلی، تراوسه دغه ټوله موضوع تر څېړنو لاندې ده،کوم جسد هم موږ لانه دی موندلی،ځکه هلته داسې باروت کارول شوي،چې هرڅه یې کاملآ له منځه وړي دي.»
د اسلامي امارت دغه دریځ د دې ښکارندوي کوي،چې د ولسمشر بایډن ادعا یې په یوډول رد کړې،خو د امریکامتحده ایالتو بیا د خپلې ادعا د ثبوت او د برید په تړاو د اسلامي امارت د وروستیو څرګندونو په غبرګون کې لا تراوسه څه نه دي ویلي.
د سیاسي چارو شنونکي په دې باور دي،چې کابل کې د امریکا متحده ایالتو هوايي برید کې د القاعده شبکې د مشر وژنې،نړۍ سره د افغانستان سیاسي اړیکو ټینګښت زیانمن کړی دی او نړۍ نوره پر کابل باور نه شي کولای.
