د کندهار میرویس حوزوي روغتون مسوولین وايي، دغه ولایت کې په شري ناروغۍ د اخته ماشومانو شمېر کې ډېروالی راغلی او يوازې په تېرو درېیو مياشتو کې ۲۹ ماشومان له دغې ناروغۍ مړه شوي دي.
د یاد روغتون ماشومانو د څانګې مشر ډاکټر محمد صديق وايي،تیرو دوو میاشتو په جريان کې دغه روغتون ته سلګونه پر شري ناروغۍ اخته ماشومان ور وړل شوي او په خبره یې ۴۷۸ يي دوی بستر کړي دي.
صدیق زیاتوي:« کومې شمېرې،چې له موږ سره موجودې دي، ۴۷۸ ناروغان مو بستر کړي دي،چې له دې جملې ۲۹ ناروغان یې مړه شوي دي.»
ډاکټر محمد صديق د ماشومانو د مړينې تر ټولو لوی لامل روغتون ته پر وخت د هغوئ نه ور وړل يادوي او ټینګار لري، چې والدین دې خپلو ماشومانو ته د شري واکسین وکړي.
هغه زیاته کړه:« د شري ناروغي په هوا په سړېدو او هم د هوا په ګرمیدو سره ډېریږي. دا تاسو ته مالومه ده،چې دا یوه وېروسي ناروغي ده او نورو ته هم انتقال کېږي. که چېرې ماشومانو ته منظم واکسین وشي، نو مخنیوی یې کېدی شي.»
اخوا د کندهار میرویس حوزي روغتون کې د شریفې په نوم یوې مور خپل درې ماشومان،چې پر شري ناورغۍ اخته شوي، بستر کړي دي.
شریفه وايي،لومړی يي یو ماشوم په شري اخته شو او دوه نورو ته یې هم انتقال شو،چې د وضعیت په خرابیدو اړه شوه، روغتون کې يې بستر کړي.
هغې زیاته کړه:« یو ماشوم مې دلته راوست، بست مې کړ،چې بېرته کور ته ولاړم، دوه نور ماشومان هم پر دې ناروغۍ اخته شوي ول، بیا مې هغه هم دلته راوړل او بستر مې کړل. نن مې
۱۳ مه شپه ده، چې دلته روغتون کې یم.»
دا په داسې حال کې ده،چې روان کال د وري په ۱۵مه نیټه د افغانستان اسلامي امارت روغتیا وزارت اعلان کړی وه،چې په هېواد ۲۵ زره ماشومان پر شري ناروغۍ اخته شوي،چې په وینا یې له دې جملې څخه ۱۸۶ ماشومان مړه شوي دي.
