پوتزل: د افغان نجونو پر مخ دې د ښوونځيو دروازې پرانېستل شي

د ملګرو ملتونو د سرمنشي ځانګړي استازي او په افغانستان کې یوناما سرپرست مشر مارکس پوتزل ننګرهار ولایت ته  تللی او هلته یې  د له والي او نورو مسوولینو سره لېدلي دي. 

پوتزل له والي او نورو مسوولینو سره تر لېدنو وروسته د یوه خبري کنفرانس پر مهال،د روغتیا،بیارغونې،بیځایه شویو،کډوالۍ، زده کړو  او بشري حقونو په برخو کې به خپلو مرستو ته دوام ورکړي  او په دې برخو کې شته ستونزې چې له چارواکو یې واوریدلې له اړوند مرستندویه ارګانونو سره شریکې کړي . 

پوتزل وايي،د افغانان نجونو د زده کړو موضوع نړیوالو او ملګرو ملتونو ته  با ارزښته ده او  ښوونځي باید پرانېستل شي،چې دا  د نړیوالو له مرستو لپاره زمینه برابروي.

هغه زیاته کړه:« کابل کې پر چارواکو  غږ کوم،چې پراختیایي برخې باندې دې ډېرې پیسې ولګوي. ملګرو ملتونو د پراختیایي پرواګرام له لوري  افغانستان کې د افغانستان لپاره یو وجهي صندوق جوړ کړی  دی،چې په کې ۱۰۰  میلیونه ډالر ولایتونو او ولسوالیو ته ځانګړي شوي دي.» 

پوتزل وايي، نړیوالې ټولنې په تېر کې پراخه مرستې وکړې،خو سم نظارت یې نه دی شوی او پر ځای نه دي لګول شوي.

دغه راز پوتزل وايي،له سیاسي بدلون وروسته نړیواله ټولنه باوري نه ده،چې زیاتې مرستې وکړي، ځکه اندیښنې لري،چې پر ځای به ونه لګول شي ، خو د ملګروملتونو اداره کوشش کوي، چې هغوی مرستو ته چمتو کړي.

هغه زیاته کړه:« نړیوال بانک هم د افغانستان پراختیايي صندوق له لارې ډېرې پیسې د  افغانستان لپاره ځانکړې کړي دي او دا پیسې باید لا زیاتې شي او ښوونې برخې باندې تمرکز زیات شي. زه خبر شوی یم،چې ښوونځي د جوړیدو په حال کې دي او نجونې هم باید د هلکانو په څېر ښوونځیو ته ولاړې شي.» 

په ورته وخت کې پوتزل وايي، د افغانستان اسلامي امارت باید د خبرو په دې لړۍ کې چې له امریکا سره یې د بانکي اسانتیاوو په تړاو پیل کړې، له نرمښته کار واخلي،ترڅو د افغانستان کنګل شوې پیسې ازادې شي . 

هغه زیاته کړه:« د اګست له ۱۵  مخکې افغانستان ته د نړیوالې ټولنې له لورې زیاتې پیسې راتلې،چې نړیواله ټولنه یې په سم ډول لګولو کې ناکامه وه او د فساد برخه ګرځېدلې وه،نو ځکه اوس نړیواله ټولنه زړه نا زړه ده او د هغې تیروتنې د تکرار له وېرې مرستې نه کوي.» 

د ننګرهار والي ملا محمد نعیم اخوند بیا وايي، د خلکو ستونزې یې د ملګرو ملتونو  له استازي سره شریکې کړې.

اخوند زیاته کړې،د نجونو د زده کړو په اړه به د مشرتابه پریکړې ته ګوري او هغوی چې هر ډول پریکړه وکړي،دوی به یې عملي کړي . 

ملګرو ملتونو په  بار بار له نړیوالې ټولنې د افغانانو لپاره مرستې وغوښتې،چې یو شمیر هېوادونو د بشري ناورین او لوږې د مخنیوي لپاره پراخه مرستې وکړې، خو د دې ادارې د وروستیو راپورونو له مخې لا هم د نړیوالو مرستې بسنه نه کوي او دې لپاره چې خلک د لوږې او بیوزلۍ له دې سخت پړاو ووځي ،د مرسته کوونکو هېوادونو لا زیاتو  همکاریو ته اړتیا ده.