کارپوهان: د ازبکستان په کوربتوب راتلونکې ناسته د افغانستان لپاره یو ښه فرصت دی

د سیاسي چارو یو شمېر کارپوهان وايي،د افغانستان په تړاو  ازبکستان کې جوړېدونکې ناسته د کابل لپاره تاریخي فرصت دی،چې باید ترې ګټه واخلي اوله نړۍ سره د اړیکو تازه فصل پرانیزي. 

دوی وايي، په دغه ناسته کې د نړۍ ۲۰  هېوادونو استازي ګډون کوي او افغان لوری باید د نجونو د ښوونځیو د پرانېستې او د ښځو حقونو  د منلو له زیري سره دغې ناستې ته ورشي.

 د کارپوهانو په خبره،که د افغانستان نوی حکومت په خپل اوسني سیاست کې بدلون راولي او د ولسونو ګډون ترڅنګ د ښځو حقونو ته ژمنیتا وښي،نو لرې نه ده،چې په دغه ناسته کې به  د نړۍ او افغانستان ترمنځ د اړیکو  او رسمیت پیژندنې نوی پړاو پرانېستل شي. 

د سیاسي چارو شنونکی حکمت الله حکمت وايي:« د ازبکستان ناسته یو تاریخي فرصت دی او د داسې هېواد په کوربتوب باندې،چې د افغانستان لپاره ښه نیت لري،خو که د اسلامي امارت چارواکي دغې ناستې ته په خالي لاس ورشي،له دې ناستې به څه په لاس رانه وړي او که په ډک لاس ورشي، نو ښايي د مشروعیت او له نړیوالو سره د اړیکو نوی فصل پرانیزي،ډک لاس په دې مانا،چې د نجونو ښوونځي پرانیزي،د ښځو حقوق ومني،په خپل سیاست کې تغیر راولي او د ولسونو ګډون هم ومني .»

د پوهنتون استاد فیض محمد ځلاند بیا وايي، د ازبکستان په  دغه ناسته کې باید د افغانستان د ستونزو پر حل،بشري ناورین، بیکارۍ او  د کډوالۍ پر مخنیوي  بحث او خبرې وشي. 

ځلاند وايي، په دغه ناسته کې باید له امنیتي پلوه د سیمې ټولې  اندیښنې ځواب شي،چې نور دې له افغانستانه وېره نه لري او  د ښې راتلونکي لپاره دې له کابل سره نوې دروازې پرانیزي. 

هغه زیاته کړه:« په ازبکستان کې باید د افغانستان د اوسنیو ستونزو په حل لارو تمرکز وشي او د دې ترڅنګ دې د افغانستان په بشري ناخوالو،پر بیکارۍ، د کډوالۍ مسلې او پر امنۍ دې خبرې او بحثونه وشي،سیمې ته ډاډ ورکړل شي،چې نور دې له افغانستانه په وېره کې ونه اوسي، د ترهګرۍ ځالې وچې شوي دي او په لویه کې سیمه افغانستان کې کولای شي، د یوې روښانه راتلونکي لپاره نوې دروازې برانیزي.» 

ټاکل شوې  ده،چې د روانې جولای میاشتې په وروستیو کې د ازبکستان پلازمینه تاشکند کې د افغانستان په تړاو نړیواله ناسته جوړه شي،چې د نړۍ ۲۰ مهمو هېوادونو استازي به په کې ګډون وکړي او د ریپوټونوله مخې، په دغه ناسته کې د افغانستان استازی هم ګډون کوي. 

اوس تمه داده،چې دغه ناسته به له نړۍ سره د اړیکو لپاره کابل ته نوې لارې پرانیزي.