له ښوونځيو راګرځول شوې نجونې: د خپلې راتلونکې په اړه اندېښمنې یو

له نږدې یوه کال راهیسې له شپږم ټولګي پورته د نجونو ښوونځي تړل شوي او له یو میلیون زیاتې نجونې له نامالوم برخلیک سره مخ دي. 

هغه نجونې چې د تعلیمي کال له پیله یې پرمخ د ښوونځي دروازې بندې دي، وایې، د خپلې راتلونکې په اړه اندېښنه لري او له اسلامي امارت غواړي،چې ښوونځي یې پرانیزي.

یوه زده کوونکې وايي:« له اوسني حکومته غواړو څو ښوونځي پرانیزي. موږ غواړو تحصیل وکړو او د خپل هېواد راتلونکی جوړ کړو. خپلې ټولنې ته خدمت وکړو. موږ هغه کسان یوو چې کولی شو په راتلونکي کې خپل هېواد اباد کړو.»

یوه بل زده کوونکې بیا وايي:« ۱۰ میاشتې کېږي،چې ښوونځي تړل شوي. موږ غواړو،ترڅو ښوونځي مو ژر تر ژره پرانېستل شي.»

له شپږم ټولګي پورته د نجونو پرمخ د ښوونځیو بندیدو پرېکړې کورني او نړیوال غبرګونونه پارولي او غوښتنه دا ده،چې حکومت دې د ښوونځيو دروازې خلاصې کړي.

 د سیاسي چارو یو شمېر شنونکي وايي، د افغانستان اسلامي امارت باید ولس ته وضاحت ورکړي،چې ښوونځي د کومې ستونزې او لامل  له مخې تړل شوي دي. 

د سیاسي چارو شنونکې تفسیر سیاپوش  وايي:«  ولې د ا.ا.ا غواړي،هغه دروازې چې باید پرانېستې وي، هغه یې تړلې دي. په دې هېله،چې د هغو نجونو پر مخ چې د خپل هېواد راتلونکي جوړلو هېله لري، ژر تر ژره بندې دروازې خلاصې کړي.» 

سره له دې چې د افغانستان اسلامي‌امارت په وار وار ویلي، د ښځو کار او دنجونو زده‌کړو ته ژمن دي او په هغه طرزالعمل کار کوي،چې پر اساس یې ښوونځي پرانېستل کیږي، خو دولتي ویاندویان او د پوهنې وزارت د ښوونځيو د پرانېستلو په موخه د ټاکل شوې کمیټې له کار او پرمختګ مالومات نه لري.

د افغانستان اسلامي امارت د ویاند مرستیال بلال کریمي وايي:« تعلیم برخه کې که څه هغه په عصري، دیني، روغتیايي، کرنې، اقتصادي پرمختګ او نورو برخو کې وي،خپلې غوښتنې مطرح کړې. ا.ا.ا د علماوو غوښتنو او وړاندیزونو ته درناوی لري او ا.ا.ا هم په دې برخه کې د جدي اقداماتو په لټه کې دی.» 

واک ته د افغانستان اسلامي‌ امارت له رسیدو سره د نجونو پرمخ ښوونځي او پوهنتونونه وتړل شول، چې لوړو زده‌کړو وزارت د پوهنتونونه دروازې پرانېستلې،خو تر اوسه پورې یې د پوهنې وزارت نه دی توانیدلی،چې له شپږم ټولګي پورته د نجونو ښوونځي خلاص کړي.

له شپږم ټولګي پورته د نجونو ښوونځيو تړل کېدو پرېکړې پر نړیواله کچه غبرګونونه راپارولي او د افغانستان له اسلامي‌امارت  یې د ژر پرانېستلو غوښتنه کیږي، خو تراوسه مالومه نه ده،چې حکومت د ښوونځیو  د بیا  پرانېستلو په تړاو خپله پریکړه څه وخت وروستۍ کوي.