کارپوهان: د علماوو ناسته کې د ولس غوښتنې مطرح نه شوې

په کابل کې د علماوو درې ورځينۍ ناسته،چې له څلورنیم زره زیاتو دیني‌علماوو په ‌کې ګډون کړی وو، له درې ورځو سلا مشورو او بحثونو وروسته یې ۱۱ ماده ‌ییز پریکړه لیک اعلان کړ.

پریکړه لیک کې، د اسلامي امارت له مشرتابه بیعت اعلان شو، نړۍ سره تعامل، اقتصاد او تعلیم ته د حکومت په پاملرنې ټینګار شوی او د اسلامي امارت پر ضد وسله وال مخالفتونه شرعاا ناروا وبلل شول.

ښځو،ماشومانو او لږکیو ته د حقونو ورکړه،هغه مسایل دي، چې پریکړه لیک کې ترې په سطحي توګه یادونه شوې، هغه څه چې افغانانو یې د حل لپاره د ناستې یوې مشخصې پریکړې ته انتظار ول. 

کارپوهان سره له دې چې باور کوي، ناسته کې د ولس غوښتنې په کې نه دي مطرح شوي،خو وایي اسلامي امارت به د خپلو ګټو لپاره د دې پرېکړه لیک ځینې مادې ژر عملي کړي.

د سیاسي چارو شنونکی اختر محمد راسخ وايي:« هغه ګوندي پرېکړې، چې دوی باید نیولې وی، هغه یې ونیولې. زما پر اند دا د  رد وړ هم نه ده  او د تائید وړ هم ده. خو د روانو بحرانو او ستونزو، چې موږ یې په اقتصادي او نظامي برخو کې  لرو، له نړۍ سره مو د تعامل ژبه نه ده پیدا کړې. افغانستان کې لنډمهالی حکومت تر اوسه پورې چا پر رسمیت نه دی پېژندلی. دغو ټولو ناخوالو ته دوی د حل لاره پیدا نه کړه. » 

د سیاسي چارو شنونکی قریب الرحمن شهاب وايي:« د علماوو په ناسته کې یوازې پر هغو مواردو بحث شوی دی،چې هغه له وړاندې هم د طالبانو له لوري مطرح شوي ول، یعنې داسې نوې مسله،چې هغه دې نړۍ افغانانو ته متوجې وي، په دغې ناسته کې نه وه. » 

د علماوو دغې سترې غونډې په  تړاو نړیوالو هم وېشلي نظرونه وړاندې کړي دي.

پوښتل شوي، کله چې د اسلامی امارت مشرتابه نړیوالو ته ننګونکې خبرې کړي او دوی سره یې تعامل رد کړی،دا خورا یو سخت دریځ دی.

خو د افغانستان اسلامي امارت د ویاند مرستیال بلال کریمي بیا وايي، د دیني علماوو غونډې ته په درناوي قایل دي او هڅه کوي،د هغوی له مشورو ګټه واخلي او د دیني علماوو غوښتنې عملي کړي.

کریمي زیاتوي:« اسلامي امارت د علماوو او متنفذینو غوښتنو ته ډېر درناوی لري، نو ټول هغه موارد او نقطې،چې زموږ د هېواد ګټې او ارزښتونه ورسره په ټکر کې نه وي، اسلامي امارت هغه ګامونه اخلي او څاري یې.» 

په افغانستان کې جرګې او لویې غونډې چې زیاتې یې د حکومتونو په خوښه جوړې شوي دي،پر خپلواکه توګه یې پرېکړې نه دي کړي او تل یې د حکومتونو له دریځونو ننګه کړې ده. 

اوس به ولیدل شي،چې د افغانستان اسلامي امارت راتلونکې کې بل څه اقدام کوي،خو  د کورني مشروعیت لپاره یې ور پرانېست.