کابل کې ښځینه فعالانو د نجونو ښوونځیو تړلي پاتې کیدو په غبرګون کې اعتراضیه غونډه وکړه

په‌ کابل کې یو شمېر ښځینه فعالانو د یکشبنې پر ورځ د « ۱۴۰۱ کال د چنګاښ پر ۱۲ مه»  د نجونو ښوونځیو د بندیدو په تړاو اعتراضيه غونډه وکړه. 

دغه اعتراضیه غونډه،چې د کابل انتقادي مکتب تر چتر لاندې رابلل شوې وه، د ښځینه فعالانو ترڅنګ د مدني ټولنې یو شمیر غړو هم په‌ کې ګډون کړی وو. 

د غونډې وینا والو وویل،زده‌کړې د نجونو اساسي حق دی او پر نړیوالې ټولنې او اسلامي‌امارت یې غږ وکړ،چې د نجونو پرمخ دې د ښوونځیو دروازې خلاصې کړي.

د ښځو حقونو فعاله اینور ازبک وايي:« په اخر کې یو ځل بیا غږ کوو څو د نجونو پر مخ د ښوونځیو دروازې خلاصې کړي او نجونې دې د زده کړو له حقه نه محروموي.»

یو شمیر ښځینه فعالانو دعلماوو درې ورځينۍ ناستې ته په ‌اشارې وویل،هېڅ نارینه د ښځو استازیتوب نه‌ شي کولای او څوک دې له نجونو د تعلیم حق هم نه اخلي.

د ښځو حقونو فعاله نازیه سحر وايي:«   هر سیاسي افت دې د نسلونو د بېسوادۍ لامل نه کېږي. هر سیاسي ابر قدرت چې په هر مفهوم حاکم وي، پر موږ پورې تړاو نه لري. د ښوونځیو دروازې خلاصې کړئ څو د جهل تراژيدي پای ته ورسیږي. د ښځو په جرم د نیمايي ملت وژنه ممکن نه ده. پوهېږو د دې نیمايي لرې ساتل غیرمستقیم قتل دی خو شونی نه دی. » 

مدني فعال محمد رضا میرزايي وايي:« د علم زده کړه له هغو احکامو ده چې د نارینه او ښځو ونډه پکې مشترکه ده. اسلام دین د زده کړو په برخه کې جنسیت نه پلمه کوي. که ځینې ایتونه وڅېړو، هغه ټولیز دي او د ښځو او نارینه وو تر منځ بېلتون نه راولي.»

معترضینو د علماوو درې ورځينۍ ناسته د توقع خلاف وبلله  او د نیوکې په توګه یې وویل، دوی ورته کومه هېله‌ مندي نه لرله.

د ښځو فعاله شهلا عارفي وايي:« موږ له دې لویې جرګې هېڅ غوښتنه نشو لرلی، ځکه چې نه په لویه جرګه کې او نه هم د علماوو شورا کې، نه مخکې او نه هم وروسته له دې زموږ لپاره کوم څه نه کوي. یوه کس خپل ځان د ښځو استازی ټاکلی و. دا حماقت ده. ایا یوه ښځه، ښځه درکولی شي که نر؟ که چېرې موږ وګورو دلته ښځې له ګڼو ستونزو سره د بېلابېلو قشرونو پر وړاندې مبارزه کوي. ایا یو نر کولی شي زموږ استازیتوب وکړي.»

د ښځو فعاله جمیله احمدزۍ وايي:« موږ چې څو ژوندۍ یوو خپله مبارزه کوو. څو نړۍ کې یوو خپلې مبارزې ته دوام ورکوو. څو چې دا حکومت زموږ خبرو ته غوږ ونه نیسي او ښوونځي پراننیزي موږ مبارزه کوو.» 

د نجونو پرمخ د ښوونځیو تړلو په غبرګون، رابلل شوې ناسته کې نارینه‌ و هم ویناوې وکړې او ښوونیز بهیر نور ځنډ یې د هېواد پر زیان وباله.

د غونډې یو تن ګډونوال ډاکټر حکیم حکمتیار وايي:« د ښوونځیو دروازې دې د نجونو پرمخ پرانیزي. تحصیل وخت او فرصت غواړي او که چېرې د دوی پر وړاندې درې کاله یا هم یو کال ښوونځي خلاص نه وي، ډېر تاوان به وکړي او دا به د جبران وړ نه وي.» 

د نجونو ښوونځیو بندیدو په تړاو د کابل انتقادي مکتب‌ تر چتر لاندې یاد کنفرانس په پنځه‌ماده‌ییز پریکړه لیک پای ته ورسید او ویناوالو خبرداری ورکړ،چې د خپلو اساسي حقونو او زده‌کړو لپاره خپلې مبارزې ته دوام ورکوي.

دغه اعتراضیه ناسته داسې مهال جوړېږي،چې له شااوخوا یوه کال راپدیخوا له شپږم ټولګي پورته د نجونو پرمخ ښوونځي تړل شوي او د پرانېستلو په تړاو یې کومه پریکړه نه ده شوې.