د ا.ا.ا مشرتابه: د نړۍ فرمایشونه نه منو 

د افغانستان اسلامي امارت امیرالمؤمینین شیخ هبة الله اخوندزاده په کابل کې د لویې جرګې تالار کې د علماوو غونډې ته د جمعې پر ورځ د « ۱۴۰۱ کال د چنګاښ پر ۱۰مه»  شاا وخوا یو ساعته وینا وکړه.

اخواند زاده وايي، نړۍ غواړي،د افغانستان نظام د دوی په اشارو مخته لاړ شي،خو په دې ډول ورسره یو ګام هم مخته نه ځي  او د الله پر شریعت ورسره معامله نه کوي. 

د اخوندزاده  په خبره،  نړۍ ورته په هغه څه د منلو نه ده،په څه چې الله ناراضه کیږي. 

اخوندزاده زیاته کړه:«نړۍ موږ نه غواړي،چې د افغانستان حکومت په خپلواکه اراده باندې روان وي، غواړي،چې د دوی په اشارې سره مخته ولاړ شي. موږ ته مشورې راکوي، دا کار وکړه، ولې یې نه کوې؟ ته زما پر کار  څه کار لرې؟ زما پر نظام څه کار لرې؟ زما پر هېواد څه کار لرې؟ زما پر اصولو څه کار لرې؟ ته ولې لاسوهنې کوې؟ زه ستا د فرمایشاتو نه یم. نه دې فرمایشونه منم او نه هم یو ګام درسره مخته ځم. نه تعامل درسره کوم،نه پر شریعت باندې درسره معامله کوم. اوس خو به راغلی، د بمونو مور به دې استعمال کړي وي، خو که اټوم هم پر موږ راباندې استعمال کړې، دا مو له الله ج سره ژمنه ده،چې موږ به یو ګام په هغه څه کې درسره وانخلو،چې الله ج ناراضه شي.» 

هبة الله اخوندزاده وايي،هیڅ ځواک نور پرافغانستان  نظامي برید ته زړه نه ښه کوي،خو هڅه کوي چې فتنې راپورته کړي او د اسلامي  امارت ترمنځ اختلاف جوړ کړي،چې اختلافات کولای شي اسلامي امارت له منځه یوسي او باید د اسلامي امارت ټول چارواکي خپل یووالی وساتي. 

 د هبة الله اخوندزاده پر وینا،له کفرۍ نړۍ سره یې دعقیدې جګړه وه او اوس هم دغه جګړه روانه ده.

هغه زیاته کړه:« انشاء الله دا ځل به  یو کافر هم پر افغانستان باندې د برید زړه ښه نه کړي،چې دوی به نظامي عملیات کوي. خو د فتنې او تبلیغاتو عملیات به کوي. دلته به فتنې جوړوي. دلته به د حکومت او ملت ترمنځ فاصله پیدا کوي. دلته به داسې موضوعات راپورته کوي،چې په هغه کې اختلاف راشي. خپله  د حکومت په بدنه کې به یو بل داسې برابر کړي، چې یو به پر یوه نیوکه کوي او بل به پر بل نیوکه کوي،چې د حکومت جوړښت کمزوری شي او اختلاف رامنځته شي. د دغه اختلاف په پایله کې به امارت له منځه ځي.» 

په ورته وخت کې هبة الله اخوندزاده وايي، دننه په حکومت کې امنیت  اړین دی،چې څوک د فساد، زورواکۍ،انډیوال پالنې،سمت او قومپالنې هڅه ونه کړي او پر شخصي مصلحتونو باید عامه مصلحتونو ته ترجیح ور نه کړل شي،ځکه د امنیت، ثبات او شریعت تطبیق لپاره  لومړنی شرط د شخصي خواهشاتو پریښودل دي. 

دغه راز هبة الله اخوندزاده د غونډې ګډونوالو ته په وینا کې ټینګار درلود،چې باید په محاکمو کې عدالت تامین شي. 

د هبة الله اخوندزاده په خبره، که عدالت نه وي،نو الله ته اسانه ده،چې په لنډو شیبو کې اسلامي امارت له منځه یوسي او هېواد دتباهۍ لور ته لاړ شي .

هغه زیاتوي:« عدالت د یوه حکومت د بقاء وسیله ده. له ظلم سره حکومت نه پاتې کېږي.» 

داسلامي امارت امیرالمؤمنین وايي، بهرنۍ مرستې د هېواد اقتصاد نه شي رغولی، باید خپله افغانان لاس په کار شي او ملي سوداګر دې په خپل هېواد کې پانګونه وکړي،چې له دې سره اقتصادي پرمختګ رامنځ ته شي.

هبة الله اخوندزاده زیاته کړه:« اقتصاد پر دې جوړیږي،چې د هېواد خلک سره یو بل ته لاس ورکړي. تاسو پر بهرنیو مرستو اتکاء مه کوئ، نه بهرنۍ مرستې موږ پورته کولای شي، نه زموږ اقتصاد راجوړولی شي. که اقتصاد مو سموي، له احتیاجه مو وباسي، له غربته مو وباسي، خپلواکۍ ته مو راباسي، هغه دا خپل همت دی. خپله لاس سره ورکړئ، سوداګر دې راشي، څه خطر لري؟ راشئ! په دې خپل هېواد کې پانګونه وکړئ. دا خپل هېواد اباد کړئ.» 

هبة الله اخوندزاده هغو څیرو  ته چې د اسلامي امارت له راتګ سره یې افغانستان پریښی او په ترکیې هېواد کې د مقاومت په نوم یې شورا جوړه کړې،په اشارې سره وویل، له فتنې دې لاس واخلي، عفوه ورته شوې او خپل هېواد ته دې راستانه شي. 

هغه زیاته کړه:« اوس مو عفوه درته کړې ده، راځئ،دلته په هېواد کې شپې ورځې تېروئ. هغه عزت چې په خپل هېواد کې یې لرئ، په بل هېواد کې یې نه لرئ. د کافر په هېواد کې تاسو عزت نه لرئ. ولې ځان بې عزته کوئ؟ نه یې ستا زوی لري، نه یې ستا کورنۍ لري، نه یې ته لرې. راشه ! په دې هېواد کې کېنه. موږ حساب درسره نه کوو. خو  شرارت ته به لاس نه اچوې. دسیسې به نه جوړوې. امن به نه خرابه کوې. که دې امن خراب کړ،بیا به د عمومي مصلحت له مخې مجازات شې.»  

د افغانستان اسلامي امارت امیرالمؤمنین وايي، په تیره شل کلنه جګړه کې یې چې د اشغال پر وړاندې یې ترسره کړه، هیڅ کله یې هم په قصدي ډول افغانان نه دي په نښه کړي او هغه که وژل شوي هم دي،د یوه  لوی هدف لپاره چې هغه د جهاد بریا د اسلامي نظام راتګ او سراسري امنیت ټینګښت وو. 

دغه راز د افغانسان اسلامي امارت  امیرالمؤمنین ګاونډیو ته ډاډ ورکړ، چې هیڅ کله به هم له افغانستانه ورته زیان پیښې نه شي.