ملګرو ملتونو افغانستان ته د بېړنیو مرستو او ځانګړې پاملرنې غوښتنه کړې

د ملګرو ملتونو د امنیت شورا په  ناسته کې  افغانستان کې د وروستۍ مرګونې زلزلې سربېره د افغانستان پر وضعیت خبرې وشوې.

افغانستان کې د ملګرو ملتونو سیاسي استازولۍ (یوناما) مشر رامز اکبروف په خوست او پکتیکا ولایتونو کې د وروستۍ مرګونې زلزلې په تړاو چې له  ۱۰۰۰ زیات کسان  په کې مړه  او شااوخوا ۱۵۰۰ کسان یې ژوبل  کړي او سلګونه کورونه یې ویجاړ کړي، یادونه کړې او د قربانیانو کورنیو ته یې پر بېړنۍ رسیدنې ټینګار کړی دی.

الاکبروف زیاته کړې:« راتلونکو ۲۴ساعتونو کې به له اغیزمنې سیمې لیدنه وکړم، د اغیزمنو کورنیو او مخامخ مرسته کوونکو سره به ووینم. د ښځو او مدني ټولنو د غړو په ګډون به ټولو هغو خواوو سره وګورم،چې د مرستې رسونې ډاډ رامنځته کوي او په ټوله کې د مرستې رسونې ته کار کوي.» 

د امنیت شورا ناسته کې د بشري حقونو بد وضعیت، اقتصادي ناورین، روان بېړنی بشري وضعیت او د اسلامي امارت له  مشرانو سره د تعامل اړتیا لومړېتوبونه یاد شول.

الاکبروف د امنیت شورا غونډې ته د افغانستان روان اقتصادي وضعیت د اندېښنې وړ یاد کړ  او پر وینا یې  د روان زېږدیز کال تر پایه د بې وزلۍ کچه  ۹۷ سلنې ته لوړېدی شي.

هغه زیاته کړه:« که اقتصاد په سمه او پاېیدونکې توګه بېرته و نه رغېږي،نو افغانان به له تکراري بشري ناورینونو سره مخ شي. دا د پراخو کډوالیو او د افراطیت لپاره د شرایطو د برابروونکو حالاتو او بلې وسله والې جګړې لامل کېدی شي.»

ملګرو ملتونو خبرداری ورکړی دی،چې د ۲۰۲۲ زېږدیز کال تر پایه د بې وزلۍ کچه تر ۹۷ سلنې لوړېدی شي.

افغانستان کې ملګرو ملتونو د سیاسي استازولۍ مشر، دلته د بیان ازادۍ په محدودیدو اندېښنه وښوده او په خبره  یې، یوناما لا هم د طالبانو له لوري د بشري حقونو د سرغړونې پیښې ثبت کوي.