ملګري ملتونه افغانستان کې د کډوالو او بې ځایه شویو کورنیو ملاتړ کوي

افغانستان او پاکستان ته د ملګرو ملتونو کډوالو عالي کمیشنر مرستیالې کیلي کلیمینټس اوونیز سفر پای ته ورسېد او د خپل سفر پای کې یې ډاډ ورکړی، چې افغانستان کې به د کډوالو او بې ځایه شویو کورنیو بشپړ ملاتړ کوي.

د ملګرو ملتونو کډوالو عالي کمیشنرۍ د کلیمینټس سفر په تړاو خپره کړې خبرپاڼه کې ویلي، دا ملاتړ به نه یوازې د هغو درې نیم میلیونه کسانو لپاره وي،چې د جګړو له امله پر کوردننه بې ځایه شوي،بلکې هغه افغان کډوال هم په کې شامل دي،چې له نوروهېوادونو راستنیږي.

د خبرپاڼې یوه برخه:« د ملګرو ملتونو کډوالۍ عالي کمیشنرۍ له تېرو ۴۰  کلونو د افغانانو ملاتړ کړی او دې ملاتړ ته به دوام ورکوي. دا ملاتړ په اوس کې لا پراخیږي او هڅه کیږي،چې د بې ځایه شویو، بېرته راستانه شویو او کډالو بشپړ ملاتړ وشي. موږ به په ټول افغانستان کې خپل حضور پراخوو.» 

کلیمینټس افغانستان کې د خپل څلور ورځني حضور په لړ کې هرات ته لاړه او هلته یې د ښځو او نجونو اندېښنې هم واورېدې.

د کډوالۍ ادارې د افغان ښځو او نجونو هغه وضعیت په تړاو هم اندېښنه ښودلې  ده، چې د تېر کال له اګست میاشتې راپدیخوا رامنځته شوی دی.

کلیمینټس  زیاته کړې:« افغانې ښځې مقاومت کوونکي دي. هغوی  له ماسره د زده کړو په اړه وغږیدې، د ژوند په اړه وغږیدې او دا یې وویل چې غواړي د ژوند په ټولو چارو کې ونډه ولري. هغوی غوښتل چې لوڼې یې ښوونځیو ته لاړې شي،ترڅو د خپل هېواد راتلونکې جوړه کړي.» 

د ملګرو ملتونو کډوالۍ عالي ادراې سږ کال تر دې دمه نږدې یو میلیونه کسانو ته د ژمنیومرستو، سرپناه او نورو مرستو ترڅنګ د نغدو پیسو مرستې هم کړي دي.

د دې ادارې شمېرې ښیي،چې پاکستان کې  دمګړی یو اعشاریه درې میلیونه اسناد لرونکي او یونیم میلیونه بې اسنادو افغان کډوال اوسېږي،چې له ډلې یې ۲۵۰ زره د تېر کال اګست میاشتې وروسته یادهېواد ته تللي دي.