کارپوهان: د ځیني اختلافي نظریاتو له امله حکومت د علماوو شورا په راغوښتلو کې پاتې راغلی 

په پام کې ده، چې د افغانستان اسلامي امارت له ټولو ولایتونو کابل ته، د یوې جرګې په توګه د علماوو شورا راوغواړي او د جرګې غړي به د هېواد لویو جنجالي مسایلو پرسر بحثونه وکړي.

د نجونو زده کړو او کار،کورنی او نړیوال مشروعیت هغه مهم، لوی او اختلافي مسایل دي، چې تراوسه پورې د اسلامي امارت ترمنځ نه دي حل شوي.

د سیاسي چارو کارپوهان وايي،اسلامي امارت هڅه کوي،خپل ځينې علماء چې اختلافي نظریات لري،د جرګې او شورا لپاره راضي کړي.

د سیاسي چارو کارپوه بلال فاطمي وايي:« د شورا د ځنډیډو علت تر اوسه پورې  اسلامي امارت کومه واضح توضیح نه ده ورکړی، خو داسې ښکاري،چې دوی په خپل منځ کې داسې علماء شته دی،چې هغه د ځېنو مسایلو په اړه اختلافي نظر لري. دوی غواړي،چې هغوی ته قناعت ورکړي او دې ته یې راضي کړي، کوم مسایل چې دي، په سیاسي او فکري لحاظ حل سره حل کړی

شي، ترڅو له دغه  بحرانه ووځي. ځکه دې کې ځینې داسې علماء شته دی،چې ذهن یې سیاسي نه دی.» 

څه د پاسه ۹ میاشتو په تېرېدو سره اسلامي امارت نه دی توانېدلی،چې نړیوال مشروعیت ترلاسه او د سرپرست حکومت موده ډاګیزه کړي.

کارپوهان وايي،نړیواله ټولنه هم د اسلامي امارت پر حکومت نیوکې لري،چې ګني ټولګډونه نه دی او باید نور لوري هم په کې شامل شي او خبره یې  دا هغه مهم مسایل دي چې د علماوو او لویې جرګې توافق ته اړتیا لري.

د اسلامي امارت ویاند شمشاد سره خبرو کې د علماوو شورا د جوړېدو په تړاو معلومات ورنه کړل .

د سیاسي چارو کارپوهان پر دې ټینګار کوي،چې باید شورا ته د ولس منلي کسان معرفي او د هېواد د ملي ګټو پراساس پرېکړې وکړي.

د سیاسي چارو کارپوه حسن حقیار وايي:« سره له دې چې اسلامي امارت پر ټول هېواد حاکم دی او ټوله جغرافیه یې په واک کې ده،خو بیا هم د کورني مشروعیت لپاره د یوې سترې ناستې راغوښتل اړین دي. اسلامي امارت هم په پام کې لري، چې همداسې یوه ستره ناسته راوغواړي. دا چې دې ناستې ته به کوم نوم ورکړل شي، اجنډا به یې څه وي، پر کومه نیټه به وي، څه وخت راغوښتل شي، دا تر اوسه پورې نهايي شوې نه ده. خو څومره چې زه خبر یم، چې اسلامي امارت غواړي، همداسې یوه ستره ناسته راوغواړي.  د ناستې راغوښتل اړین دي. هېله مو دا ده،چې دا کار څومره ژر کېدی شي، ترسره شي.» 

اوس به ولیدل شي،چې اسلامي‌امارت په څومره موده کې د علماوو شورا او لویه جرګه رابللی شي، غوښتنه دا ده،چې حکومت دې د لویو اختلافي، جنجالي او مهمو مسایلو د حل لپاره وخت نه ضایع کوي او د کورني او نړیوال مشروعیت ترلاسه کولو لپاره دې د علماوو جرګه جوړه کړي.