په پکتیا کې د غمنو حاصلات د نورو کلونو پرله کم شوي 

په سویل کې د پکتیا  ولایت په ډنډ پټان،څمکنیو او یو شمیر نورو ولسوالیو کې د وچکالۍ له کبله د غنمو حاصلات د نورو کلونو  پرتله کم شوي دي .

بزګران وایي،غنمو ته یې پر وخت اوبه نه دي رسیدلې او په خبره یې له همدې امله یې حاصلات کم دي. 

د پکتیا څمکنیو ولسوالۍ یو تن اوسېدونکی وايي:« دا خوړ وګورئ! یو څاڅکی اوبه هم په کې نه شته دی. له پسرلي راهیسې مو غنمو ته اوبه نه دي ورکړي،نو څنګه به یې حاصل زیات شي. غنم د نورو کلونو په پرتله بیخي کمزوري دي.» 

د پکتیا څمکنیو ولسوالۍ یو بل اوسېدونکی وايي:« د غنمو فصل سږ کال بیخي کمزوری دی،ځکه چې اوبه  نه شته دي. کیمیاوي سرې مو ورنه کړې او  وچکالي زیاته ده.» 

سید امین د څمکنیو ولسوالۍ مده خېلو سیمې اوسېدونکی دی، وایي، نورو کلونو کې به یې دوو پټیو تر ۷۰ منه پورې د غنمو حاصلات کول،خو سږ کال به د کرل شوي تخم اندازه هم تر لاسه نه کړي. 

هغه زیاته کړه:« دا پټی مې د تره دی. په نیمه دی او هغه بل زما پټی دی. نورو کلونو به دې دواړو پټیو تر ۸۰ منه غنم کول،خو سږ کال تخم هم نه راته کوي.» 

د څمکنیو او ډنډ پټان وریجې د پکتیا پر کچه مشهورې دي،خو سږ کال د دغو ولسوالیو په ډېری برخو کې د وچکالۍ له کبله د وریجو کرل ناشوني دي. 

د دغو سیمو ډېری کلیو کې د اوبو څاګانې هم وچې شوي او خلک یې پاکو اوبو ته هم لاسرسی نه لري.

د پکتیا څمکنیو ولسوالۍ یو تن اوسېدونکی وايي:«موږ دا  ستونزه لرو. د څښاک اوبو او د ځمکو د اوبو دلته دوه فصله کیږي، وریجي هم هر کال کیږي،خو سږ کال ناشونې دي.» 

د پکتیا څمکنیو ولسوالۍ یو بل اوسېدونکی بیا وايي:« دلته هر کلي کې ډېری څاګانې وچې شوي. د څښاک اوبو کمی دی، په سخته پیدا کیږي.» 

د یاد ولایت د چاپیریال ساتنې ریاست مسوولین وایي، پکتیا کې د وچکالۍ له کبله د اوبو کچه تر ۸۰  سلنې ټیټه شوې او خلک باید د اوبو له استعمال سره احتیاط وکړي.